Liam Neeson po përjeton ditë të vështira pas një deklarate të bërë në një intervistë. Aktori i njohur tha se ishte zemëruar kaq shumë kur mori vesh se i kishin përdhunuar një njeri të afërt, sa doli në rrugë për një javë rresht që të zihej me dikë në mënyrë që të ‘vriste ndonjë bastard të zi’.
Deklarata e tij u cilësua si raciste dhe mijëra njerëz bënë thirrje për bojkot ndaj tij. Karriera e Neeson duket se do njohë vetëm rënie tani dhe gjërat kanë nisur pasi atij i është anuluar një ceremoni me tapet të kuq.
Disa thonë se është e tepruar që të kryqëzohet aktori vetëm pse tha diçka të vërtetë: Që njerëzit kanë një instinkt të brendshëm që kërkon hakmarrje. Ai tha se duhet të përmbahemi përballë këtij instinkti që është kaq i fortë.
Në fakt historitë e hakmarrjes janë kryesore në çdo film të irlandezit 66-vjeçar. Por edhe jeta e tij jashtë ekranit ka qenë shumë e vështirë. Ai ka luftuar vazhdimisht me demonët e tij.
Neeson u rrit në Irlandën e Veriut në kohën e Trazirave dhe ajo ndikoi shumë tek ai. Për vite me radhë ai ka pasur probleme me alkoolin dhe varësinë ndaj qetësuesve.
Aktori beson se fakti që u rrit si katolik në një zonë protestantësh, nga një baba pastrues dhe mama kamariere- ka provokuar demonët e tij. Që nga mosha 9-vjeçare ai merrej me boks dhe zemërimin nuk arriti ta menaxhonte as kur u rrit.
Në një rast ai rrahu një student që i kishte dalë para me një thikë. “Dhuna është pjesë e imja- një reflektim i ambientit toksik ku jam rritur, me vrasje e terrorizëm”.
Ai është djali i vetëm me tre motra. “Dhuna është pjesë e ADN-së sime. Një ditë vritej një katolik, më pas ekzekutohej një protestant. Një ditë bombardohej një pab katolik, të nesërmen ishte radha e një pabi protestant”.
Vitin e shkuar aktori doli kundër lëvizjes MeToo dhe mbrojti shokun e tij, Dustin Hoffman, duke thënë se po bëhet gjueti shtrigash.
Gjatë jetës së tij aktori ka qenë vazhdimisht në kërkim të dashurisë së vërtetë, siç thotë aktorja Brooke Shields, të cilës i pati propozuar, por më pas nuk e telefonoi më.
Dashuria e vërtetë erdhi kur u njoh me Natasha Richardson. Ata u martuan në vitin 1994 dhe lindën dy fëmijë. Por ana e errët e aktorit doli sërish pas vdekjes së saj në vitin 2009, kur ishte 45 vjeç. Ajo goditi kokën gjatë një aksidenti me ski, por fillimisht u duk diçka e padëmshme. Tmerri më i madh që përjetoi aktori ishte kur iu desh të fikte pajisjet që e mbanin me frymë gruan.
Në një intervistë më vonë pranoi se nisi të konsumonte shumë alkool pas vdekjes së gruas. “Sa herë hapej dera, më dukej se do futej ajo,” kujton ai me lot në sy.
Më vonë nisi edhe drogën. Pas një aksidenti me motoçikletë, u fiksua me morfinën. “Kur e mora për herë të parë, mendova: Kjo është ajo që dua, ma mbushni plot një kavanoz”.
Në një rast ai doli u zhveshur në një hotel në Kaliforni. Miqtë thonë se në vend të duhanit, ai mbllaçit kruajtëse dhëmbësh.
