Banorët e “Unazës së Re” në Tiranë po zhvillojnë këtë të mërkurë ditën e 95 të protestës, duke kundërshtuar projektin e rrugës që parashikon shembjen e banesave të tyre.
Nga megafoni i protestës u kërkua edhe përgjegjësi ligjore për zyrtarët që kanë lidhje me projektin, të cilin banorët e quajnë korruptim.
Në protestë ishin deputetë të opozitës si dhe kryetari i Partisë Demokratike Lulzim Basha. Kreu i PD-së i bëri thirrje Ramës të japë dorëheqjen deri më 15 shkurt.
“Dua t’ju falënderoj, iu drejtua Basha banorëve të ‘Unazës’, nëse ju do ta kishit ulur kokën, nëse s’do kishit qëndruar përballë terrorit që u nënshtrua ndaj jush, nëse do kishin rënë pre e propagandës, jo vetëm shtëpitë tuaja do ishin rrëzuar, por nuk do ishte zbuluar as afera korruptive pas së cilës qëndron vetë Edi Rama”.
“Nuk kanë hequr dorë nga ky projekt që ka vdekur para syve të gjithë botës”, tha Basha, i cili akuzoi se pas këtij projekti që e quajti korruptiv, qëndron vetë kreu i qeverisë. Sipas tij, Rama donte “që me vjedhjen e 20 milionë eurove të shënonte një tjetër rekord të zi”.
“E njëjta situatë është dhe në Shkodzë, ku dy kompani janë përfshirë në një megavjedhje”, shtoi kryedemokrati.
Për kreun e qeverisë, tha se “është shërbëtori i kriminelëve dhe peng i tyre”.
“Në 16 shkurt, s’është koha më për fjalë, deri më 15 shkurt Rama ka kohë ti japi zgjidhje politike krizës, duke dhënë dorëheqjen. Ndërsa në 16 shkurt, do dëgjohet vullneti juaj. Deri në 15 shkurt të largohet nga karrigia që i kanë dhënë kriminelët, ti japi zgjidhje qeverisë kalimtare. Në 16 shkurt ka vetëm një forcë që vepron, ajo e sovranit të bashkuar, është koha e qytetarëve të bashkuar”, tha kreu i opozitës. /Boldenws.al/
https://www.facebook.com/partiademokratike/videos/2194780170837822/
