Asamblea e personelit akademik në Fakultetin e Histori-Filologjisë, e thirrur në seancë të jashtëzakonshme nga Dekani, Sabri Laçi, ka diskutuar rreth situatës në këtë fakultet dhe propozimin e zgjidhjeve.
Pas konstatimit se situata mbetet shqetësuese që prej dhjetorit 2018, pedagogët e këtij fakulteti kanë vendosur si më poshtë:
Të rikonfirmojnë mbështetjen për kërkesat e drejta të studentëve dhe të garantojnë angazhimin e tyre për përmbushjen e detyrimeve të programeve mësimore
Të shpallin protestë në mjediset e fakultetit deri në fund të kësaj jave, dhe, nëse është e nevojshme edhe vijimin, një ditë në javë, deri në plotësimin nga ana e qeverisë të kërkesave të asambleve të fakulteteve të Univeristit të Tiranës, për rishikimin thelbësorë të Ligjit për Arsimin e Lartë, shfuqizimin e VKM-ve Nr. 777, 781, 783, si dhe të urdhrave nr. 183, 184, 185, të datës 26 dhjetor 2018, të cilat bien në kundërshtim me autonominë universitare dhe liritë akademike
Të krijohen grupe pune për vazhdimësinë e reagimit të FHF, koordinimin me asambletë e fakulteteve të UT-së dhe atyre të IAL-ve të tjera publike, me institucionet shtetërore dhe ndërkombëtare. Me synim ndërgjegjësimin e opinionit publik për të drejtat e studentëve dhe të stafeve akademike, si dhe për detyrimet që ka qeveria shqiptare për respektimin e tyre, përmes miratimit të akteve ligjore dhe nënligjore të konsultave paraprakisht me IAL-të publike dhe aktorë të tjerë, si dhe duke siguruar mbështetje financiare të nevojshme
Të organizojnë debate mbi problemet e krijuara në IAL-të publike në Shqipëri, në të cilat do t’u bëhen të ditura gjithë aktorëve të interesuar për zgjidhjen e tyre, me qëllim garantimin e arsimit publik cilësorë në Republikën e Shqipërisë.
