Një vajzë adoleshente është abuzuar seksualisht nga mësuesi i saj dhe më pas punonjësi i policisë, tek i cili vajza ka shkuar për të denoncuar krimin e ndodhur më parë.
Kryeministri Ramush Haradinaj në një shkrim në rrjetet sociale shkruan se ndihet i tronditur nga kjo ngjarje e rëndë dhe kërkon menjëherë që organet e drejtësisë të merren me rastin.
Haradinaj gjithashtu falenderon mediat për angazhimin e pandalshëm dhe për raportimin e rasteve të tilla, ku sipas tij shtyjnë reagimin institucional dhe shtetëror.
“Me shqetësim mora lajmin për rastin e fundit të abuzimit seksual me të miturën nga Drenasi. Jam i tronditur që një mësues që i besojmë femiun dhe një polic që i besojmë sigurinë të abuzojnë me një të mitur. Përgëzoj reagimin e shpejtë të autoriteteve komunale dhe qëndrore ndaj këtyre abuzuesve. Bashkëndjejë me familjen e të abuzuares dhe i siguroj që organet e drejtësisë do të merren me rastin seriozisht. Dua t’i falenderoj mediat për angazhimin e pandalshëm që të raportojnë për raste të tilla dhe të shtyejnë reagimin institucional dhe shoqërore. Apeloj te të gjitha vajzat dhe gratë që janë cak i abuzimeve dhe kërcënimeve të kësaj natyre, të paraqesin rastet dhe të raportojnë dhunuesit.”- shkruan Haradinaj.
Një rast edhe më i rëndë ka ndodhur në Kavajë, ku një minorene u abuzua nga 8 adoleshentë, ndërsa ngjarja u mbajt e fshehtë deri në momentin që u denoncua nga ish-Kryeministri Berisha.
Për ngjarjen në fjalë nuk pati reagim as nga Kryeministri dhe as nga ministri i Brendshëm, megjithëse ky i fundit përmes rrjeteve sociale ishte më shumë i shqetësuar për publikimin e ngjarjes së rëndë.
