Nga Boldnews.al
Prokuroria vendosi që të marrë të pandehur 4 funksionarë të Ministrisë së Drejtësisë, ndërsa nën hetim janë edhe 12 persona të tjerë.
Ndërkohë që për dy ish-ministra të Drejtësisë, gjatë kohës kur është bërë tenderi, kanë nisur verifikimet. Kështu pritet të japing sqarime pranë organit të akuzës mbi pozicionin që kanë pasur në këtë tender edhe ish-ministrat e Drejtësisë, Ylli Manjani, dhe pasardhësi i tij, Petrit Vasili.
Referuar vendimeve, masa e sigurisë arrest shtëpie është aplikuar për ish-sekretaren e Përgjithshme të Ministrisë së Drejtësisë, Juliana Hoxha, drejtorin e Shërbimeve mbështetëse Aurel Lamce si dhe specialistët e IT Lysien Ali dhe Arlind Alikaj.
Ndërkohë që hetimet përfshijnë proçesin e tenderit, mënyrën sesi është shpallur fituesi , i cili rezultoi të jetë një bashkim i operatorëve Soft & Solution, Fastech dhe Ratech. Vlera e tenderit në atë kohë kishte shumën e 2 milionë eurove. Në fakt interesimin për tenderin sikundër është raportuar në atë kohë e kishin shfaqur 7 kompani, por në përfundim 5 prej tyre nuk kishin paraqitur ofertat ekonomike, ndërsa fituesi u shpall Brenda 48 orësh.
Dyshimet e artikuluara nga mediat kanë të bëjnë me kompaninë e parë, duke u lakuar edhe emri i Ermal Beqirit, edhe pse zyrtarisht kjo kompani është në emrin e një tjetër personi, por e lidhur drejtpërsëdrejti me Beqirin.
Mediat kanë denoncuar në atë kohë se pas kompanisë fituese qëndronte Ermal Beqiri, i njohur si një nga 3 ekspertët që hodhën poshte video-skandalin mes ish-ministrit të ndjerë Dritan Prifti, dhe Presidentit actual Ilir Meta, ndërsa mbante detyrën e Drejtorit të IT pranë Hipotekës, kohë kur ky institucion drejtohej nga një tjetër emër i përzgjedhur i LSI. Gjithashtu, emri i Beqirit rezulton i përfshirë edhe në ekspertizën që iu bë serverit të Tatimeve, në kohën kur opozita deklaronte për ndërhyrje në këtë server.
Një tjetër emër është ai i ish-Sekretares së Përgjithshme, Juliana Hoxha, e cila do të kujtohet për përplasjet që krijoi në Ministri, gjatë kohës kur ajo u drejtua nga Gazmend Bardhi. Ky i fundit në kohën që drejtonte ministrinë i komunikoi largimin nga detyra Hoxhës me argumentin se kishte kandiduar për deputete e PS në zgjedhje dhe nuk mund të mbante detyrën e Sekretares së Përgjithshme të ministrisë. Në atë kohë Hoxha kundërshtoi vendimin, ndërsa ish-ministri teknik paralajmëroi padi penale për shpërdorim detyre ndaj saj.
Aurel Lamçe, një tjetër emër i përfshirë nën hetim, ka qenë në disa drejtori të rëndësishme kur drejtohej nga Nasip Naço, që duket se e ka promovuar edhe më shumë, për ta katapultuar më pas në çdo ministri ku shkonte apo kishte influence
Denoncimi
Skandali i byzylykëve u zbulua nga ish-ministri teknik i Drejtësisë, Gazmend Bardhi, i cili në kohën që mbante këtë detyrë, bëri public faktin se Ministrisë së Drejtësisë i mungonin 300 byzylyqe.
Pas denoncimit të skandalit kompania që kishte fituar tenderin reagoi duke bërë edhe dorëzimet përkatëse. Në atë kohë, kompania bëri të ditur se në datë 11.04.2017 ka realizuar dorëzimin e 300 byrzylyqeve në përputhje me termat e references dhe detyrimet kontraktuale pranë Minsitrisë së Drejtesisë (Ju vëmë ne dispozicion procesverbalin përkatës dhe akt kolaudimin), më pas me qëllim zbatimin e kontratës grupi i monitorimit të kontratës ia ka kaluar kompanisë në administrim pasi bazuar në nenin 11 të kontratës përgjegjesinë për instalimin dhe konfigurimin e tyre e ka Kompania.
Në sqarim thuhej se pas përfundimit të kontratës 4 vjeçare kompania bën dorëzimet përfundimtare të sistemit të mbikqyrjes elektronike kodet në burim, byrzylyqet dhe çdo element tjetër që ka në objektin e prokurimit sipas parashikimeve kontratuale.
Por në kushtet e mosnjohjes së kësaj procedure nga ana e Ministrit te Drejtesise po i paraqesim sot duke vijuar me tej me hapa të mëtejshëm ligjor”.
Reagimi i Bardhit
Ne një reagim për A2 CNN, Gazmend Bardhi, sot sekretar i përgjithshëm i Partisë Demokratike deklaroi se si në çdo detyrë që me është ngarkuar si ministër i drejtësisë kam punuar me përgjegjësi institucionale dhe ligjore për interesin publik. Për këtë rast dhe çdo parregullsi e shkelje që kam konstatuar u jam drejtuar organeve kompetente deri tek Auditi i Ministrisë së Financave dhe Prokuroria”.
