Çdo ditë që kalon shtohen zërat se kreu i ri i Kontrollit të Lartë të Shtetit do të jetë deputeti socialist, Anastas Angjeli. Dje deputetët e PS kanë dhënë sinjale pro tij, ndërsa deputeti gëzon dhe mbështetjen e presidentit. Por a mundet që Angjeli të marrë drejtimin e KLSH? Nëse shihet me kujdes karriera e tij, duket qartë se deputeti socialist ka përdorur shumë manovra për t’iu shmangur ligjit. Problemi më i madh i tij qëndron te universiteti privat që ai ka. Nga një verifikim që gazeta ka bërë në Qendrën Kombëtare të Biznesit, Universiteti Mesdhetar nuk figuron i regjistruar. E vetmja gjë e regjistruar në pronësi të familjarëve të deputetit është qendra “Mesdheu Education”.
Në deklarimet e pasurisë që ka bërë pranë ILDKPI, Angjeli e ka deklaruar si Organizatë Jofitimprurëse universitetin. Dhe në faqen e UMSH thuhet se ky universiteti është themeluar si OJF. Por si mund të jetë OJF një universitet, i cili gjeneron miliona lekë të ardhura? Ku shkojnë paratë që paguajnë çdo vit me qindra studentë? Anastas Angjeli është themelues dhe president i universiteti. Po ashtu, pjesë e tij janë dhe familja e tij, si djali, vajza dhe bashkëshortja. Arsyeja që ai e ka deklaruar si OJF është fare e thjeshtë: Angjeli është në konflikt të pastër interesi me këtë universiteti. Neni 28 i ligjit për konfliktin e interesave shprehet se deputeti: nuk mund të jetë drejtues ose anëtar i organeve drejtuese të organizatave fitimprurëse; nuk mund të ushtrojë veprimtari private, që krijon të ardhura në formën e personit fizik tregtar, ortakëri personash fizikë tregtarë të çdo forme, profesione të lira të avokatisë, të noterisë, ekspertit të licencuar, si dhe të konsulentit, agjentit a përfaqësuesit të organizatave të përcaktuara në shkronjën “a” të këtij neni dhe nuk mund të jetë i punësuar, me kohë të plotë, në një detyrë tjetër; nuk mund të zotërojë, në mënyrë aktive, asnjë aksion ose pjesë në kapital të një shoqërie tregtare, nëse ajo rezulton me pozitë dominuese në treg. Defakto Angjeli i shkel këto pikat.
Ai është pjesë e një organizate tepër fitimprurëse dhe jo siç deklaron ai, pasi Universiteti gjeneron miliona lekë të ardhura. Ai dhe familjarë të tij janë pjesë e një veprimtarie private që gjeneron të ardhura dhe po ashtu ata janë aksionerë. Por Angjeli i është shmangur kësaj duke e deklaruar universitetin si OJF. Është mister se si një universitet privat ku student paguajnë tarifa çdo vit të jetë jofitimprurës. Por deklarimi si OJF bën që Angjeli t’i shmanget ligjit për konfliktin e interesit dhe taksave.
Veprimtaria e djalit
Anastas Angjeli në deklarimet që ka bërë pranë ILDKP, ka deklaruar se ai dhe familja e tij kanë të ardhura nga Universiteti Mesdhetar dhe Qendra Mesdheu. Por në QKB rezulton se djali dhe vajza e tij janë aksionerë të një Shoqërie me Përgjegjësi të Kufizuar, e quajtur “Mesdheu Education”. Objekti i së cilës është: “Zotërimi, shit-blerja dhe administrimi i pasurive të
paluajtshme. Ofrimi i shërbimeve të arsimit të lartë në fushën e arsimit, kërkim shkencor, si pjesë e ofrimit të shërbimeve të arsimit të lartë, si dhe veprimtari krijuese dhe profesionale në këtë fushë në përputhje me aktet ligjore dhe nënligjore të përcaktuara nga legjislacion shqiptar përkatës ne fuqi…”. Kjo shoqëri ka kapital 100 mijë lekë të vjetra, ndërsa fitimi në vitin 2017 është deklaruar 68 milionë lekë të vjetra. Dyshimet janë se pas kësaj qendre fshihet Universiteti Mesdhetar, pasi adresa është e njëjta: Tiranë, Njësia bashkiake nr 7, bulevardi “Gjergj Fishta”. Pra duke deklaruar universitetin si OJF, Angjeli i është shmangur konfliktit të interesave, por faktet tregojnë se ai dhe familja e tij operojnë në shoqëri fitimprurëse. Një tjetër konflikti interesi është se ai është anëtar i mazhorancës, e cila përcakton politikat arsimore në vend. Po ashtu, ai si deputet voton për nisma arsimore, për të cilat është po në konflikt të pastër interesi. Madje, ai ka votuar dhe ligjin e arsimit të lartë, i cili favorizon privatin. Pra ka aq shumë konflikte interesi, saqë kjo e minon kandidimin e Angjelit për kryetar të KLSH.
/Agjensia e Lajmeve Sot News/
