Misioni Europian i Asistencës për sistemin e drejtësisë në Shqipëri, EURALIUS V ka organizuar nje takim dje për shkëmbimin e eksperiencave mes prokurorëve dhe gjyqtarëve në lidhje me luftën kundër korrupsionit dhe krimit të organizuar. Ky aktivitet zhvillohet në Tiranë në kuadër të inkurajimit të aplikimeve të gjyqtarëve dhe prokurorëve në gjykatat e posaçme dhe strukturat SPAK. Gjatë aktivitetit ishte ftuar të ndajë eksperiencën e saj edhe ish-Kryetarja e Prokurorisë Speciale Kroate (USKOK) Tamar Laptosh si dhe ambasadori i BE, Luigi Soreca. Pas reformimit, Prokuroria kroate gjatë viteve të fundit ka hetuar edhe ish-kryeministrin e vendit duke e arrestuar për korrupsion.
Tamar Laptosh ka pohuar në takim se e rëndësishme është besueshmëria e prokurorëve të SPAK dhe bashkëpunimi me Gjykatën Speciale. “Kur unë po hetoja ish-kryeministrin, besueshmëria e publikut nuk ishte shumë e lartë sepse ai ishte i fuqishëm dhe arrogant. Ne vinim nga një eksperiencë në të cilën nuk ishte hetuar ekzekutivi, por më pas u mblodhën prova dhe gjatë procesit besueshmëria e publikut u rrit”, ka thënë Laptosh.
Tamar Laptosh, pritet të qëndrojë dy vjet në Shqipëri. Ajo do të japë eksperiencën e saj se si hetohet korrupsioni dhe si hetohen zyrtarët më të lartë
Deri tani, 14 gjyqtarë kanë aplikuar nga shkalla parë dhe tetë nga apeli,për të qenë pjesë e gjykatës speciale. Ndërkohë për prokurorinë speciale SPAK, deri tani kanë aplikuar 12 prokurorë nga të cilët 9 nga krimet dhe dy të tjerë nga prokuroritë e rretheve.
