Nga Boldnews.al
Një atentat me armë zjarri ka ndodhur rreth orës 6 e 30 të mëngjesit të djeshëm në kryeqytet. Objektivi, bënë me dije burime policore për Boldnews, ka qenë Edmond Kollari, shoferi i ekskavatorit me të cilin mbeti i vrarë Ardit Gjoklaj në Sharrë, në verën e vitit 2016.
Në rrugën “5 Maji” në Tiranë, persona ende të paindetifikuar nga policia kanë qëlluar me armë automatike ndaj Kollarit, por ky i fundit nuk është lënduar.
Të njëjtat burime thanë se mbi objektin është qëlluar nga nja makinë. Në automjet, dyshohet se ishin dy persona, ndërsa armën e ka shkrepur njëri prej tyre.
Burime pranë grupit hetimor thanë për “BN” se ka pak gjasa që atentati ndaj tij të ketë lidhje me vdekjen e Ardit Gjoklajt. Pista të tjerë janë nën verifikim nga hetuesit.
“Rreth orës 06:30 të mëngjesit në numrin e Emergjencave 112 ka ardhur një telefonatë nga shtetasi E. K., 43 vjeç, i cili njofton se në rrugën ‘5 Maji’, një person i paidentifikuar ka qëlluar me armë zjarri në drejtim të tij e më pas është larguar. Shtetasi E. K., nuk ka pësuar lëndime. Shërbimet e policisë po punojnë për identifikimin dhe kapjen e autorit”, njoftoi Policia.
Edmond Kollari është arrestuar disa vite më parë si person i akuzuar për aksidentin me pasojë vdekjen e 17-vjeçarit Ardit Gjoklaj në impiantin e mbetjeve në Sharrë, ku Kollari punonte si fadromist. Pas ndalimit nga policia, Edmond Kollari u dënua me vetëm 2 vite burg nga Gjykata e Tiranës, dënim të cilin e ka shlyer.
