Tre persona janë vënë në pranga nga Policia e Gjirokastrës në tentativë vjedhjeje banese. Objekt i vjedhjes së tyre ka qenë shtëpia e anëtarit të Gjykatës së Apelit Gjirokastër, Tomor Skreli, me vendndodhje në lagjen “11 Janari”. Specialistët e Policisë Kriminale të Gjirokastrës kanë arritur të parandalojnë aksionin e tre grabitësve, duke evituar ngjarjen pasi autorët mbaheshin prej disa kohësh në vëzhgim.
Burime policore bëjnë të ditur se të arrestuarit janë: Laurenc Driza, Ilirjan Skënderi dhe Arbër Kordeci, të cilët rezultojnë se janë persona me precedentë të mëparshëm penalë. Ata janë dënuar më parë jashtë Shqipërisë për vjedhje dhe trafik narkotikësh. Prej dy ditësh, tre grabitësit nga Lushnja, Kavaja dhe Tirana, të moshës 35-40 vjeç, ishin vendosur në Gjirokastër, ku ishin pikasur nga Policia që po i mbante nën vëzhgim, duke i arrestuar në flagrancë, gjatë tentativës së grabitjes së banesës së gjyqtarit Skreli.
Gjatë kontrollit në banesën ku ishin vendosur përkohësisht, Policia ka gjetur jo vetëm leva dhe kaçavida, të përdorura prej tyre gjatë hyrjes nëpër banesa, por edhe armë. Rastet e grabitjes dhe tentativave për grabitje në shtëpitë e prokurorëve dhe gjyqtarëve nuk janë një rast i veçuar në Gjirokastër. Objekt i hajdutëve bëhen shpesh jo vetëm banesat e tyre, por edhe të oficerëve dhe policëve të konsideruar të korruptuar, pasi hajdutët kanë bindjen se në banesat e tyre ka shuma ta konsiderueshme parash të thata që i mbajnë në shtëpi.
Përveç këtij fakti, grabitësit synojnë banesat e këtyre zyrtarëve dhe për një aspekt tjetër. Policë, prokurorë e gjyqtarë shpesh janë bërë pre e vjedhjeve prej tyre dhe në këto raste nuk ka pasur asnjëherë denoncime, duke e kaluar ngjarjen në heshtje. Por, nga ana tjetër, nuk mundojnë dhe rastet kur bëhen denoncime, siç ishte ngjarja e ndodhur në shtator të vitit 2016, ku një oficer policie i Drejtorisë së Kufirit u bë pre e vjedhjes në banesë. Ai denoncoi në Polici se i janë vjedhur një shumë prej 30 mijë eurosh./Panorama
