Në stadiumin “Redi Maloku” të Fushë-Krujës u luajt sot takimi i javës së 20-të të Kategorisë Superiore mes Kastriotit dhe Skënderbeut ku përfundoi me rezultatin 2-1 në favor të vendasve. Por, përpara ndeshjes ndodhi një incident ku një grup prej 25 tifozësh u futën në fushën e blertë dhe goditën tre lojtarë të Skënderbeut.
Futbollisti i vendasve, Sokol Neziri, në një dalje për mediat vendosi përpara përgjegjësisë disa tifoz të Partizanit, deklaratë që ka ngjallur reagimin e klubit të kuq. Përmes një deklarate për shtyp, Partizani ka pohuar se skuadra ka mbështetës të shumtë në të gjithë Shqipërinë, por është distancuar nga incidenti, duke mos marrë përsipër autorësinë e ngjarjes.
Më tej, klubi i Partizanit shtoi se Neziri nuk ka të drejtë pasi gjatë incidenteve mbrojtësi po merrte detyrat e fundit për këtë duel.
Reagim:
Klubi merr shkas të reagojë në lidhje me informacionet apo deklaratat live të përcjella në media për incidentin e ndodhur përpara takimit Kastrioti – Skënderbeu i vlefshëm për javën e 20.
Është e vërtetë që Klubi i Futbollit Partizani gëzon simpatizantë dhe mbështetës në të gjitha qytetet e Shqipërisë. Por, është po aq e vërtetë se përgjatë gjithë ecurisë së këtij kampionati (dhe jo vetëm), tifozeria jonë është tifozeria më korrekte në stadiume. Për asnjë moment tifozeria e Partizanit nuk ka shfaqur akte dhune as ndaj lojtarëve të ekipeve rivale as ndaj zyrtarëve te ndeshjes, përfshirë edhe arbitrat dhe as te ketë qenë iniciatore e dhunës ndaj çdo tifozerive kundërshtare dhe në çdo stadium te vendit. Nuk e kuptojmë sesi lojtari Kastriotit Neziri arriti të identifikojë agresorët e sulmit ndaj lojtarëve të Skënderbeut, të cilët në trasmetim direkt i ka cilësuar si pjestar të tifozerisë së Partizanit, kur ndërkohë skuadra Kastriotit, siç edhe e deklaroi trajneri Devolli, në ato momente ka qenë duke zhvilluar analizën në dhomat e zhveshjes në prani të të gjithë pjesëtarëve te Kastriotit. Klubi dënon incidentin e ndodhur në Fushë Krujë dhe thekson se ngjarje të tilla nuk duhet të cënojnë aktorët e lojës së futbollit.