Që Ben Blushi dhe Top Channel janë shndërruar në patericë të pushtetit të kalbur të Edi Ramës, për opinionin publik nuk ka asnjë surprizë, por tashmë janë bindur edhe bashkëpunëtorët dhe njëherazi dy nga miqtë më të ngushtë të ish-deputetit socialist.
Andi Bushati dhe Armand Shkullaku s’kanë duruar më dhe kanë “shpërthyer” në portalin e tyre lapsi.al pas një kronike të Top Channel, sigurisht të diktuar nga ish-miku i tyre, Blushi, për ta “shitur” protestën studentore në sytë e opinionit si të kapur nga forumet rinore të PD dhe LSI…
Ky shtrembërim i të vërtetës nga një prej mediave më të mëdha në vend zbulon edhe krisjen mes tre ish-shokëve të pandarë dhe bashkëkohës të evoluimit gazetaresk në vend. Boldnews.al mëson Blushi ka shkëputur marrëdhëniet miqësore me Bushatin dhe Shkullakun.
Dhe shkak për këtë është papajtueshmëria e këtyre dy të fundit për linjën editoriale militanteske ndaj Ramës që po ndjek Blushi si drejtor i Përgjithshëm i Top Channel.
Shënimi i lapsi.al
Top Channel ka transmetuar sot një kronikë të anshme (shiko poshte) për të treguar se protestën studentore e kanë marrë peng forumet rinore të PD dhe LSI.
Nuk ka dyshim se në këtë përpjekje për ti shërbyer verbërisht propagandës qeveritare, që pretendon se kërkesat e studentëve janë plotësuar dhe ata duhet të kthehen në shkollë, televizioni që ka hall të heqë qafe me reformën e re të drejtësisë ish pronarët e dikurshëm të kësaj mediaje (me 60%), nuk e ka të vështirë të gjejë dy, tre apo më shumë militantë partiakë.
Edhe media të tjeta si Lapsi.al që e kanë mbështetur protestën studentore e kanë evidentuar rolin negativ që luajtën në të partitë e opozitës.
Pra nuk është aspak e vështirë të gjesh aty student me tesra.
Por, problemi këtu është se si ka mundësi që televizioni që i mbushi studiot e tij me freshistë që i shiste si kundërshtarë që do përballeshin me Ramën, televizioni të cilit ia përzinin gazetarët nga protesta, u shqetësuar për këto prezenca politike mes studentëve, madje duke investiguar dhe duke i shenjuar me rreth te kuq studentet e politizuar.
Përgjigja është e thjeshtë: Edi Ramës i duhet pëmbyllja e grevës së studentëve dhe petagogëve (e shpallur për nesër) pa plotësuar kërkesat dhe pa prekur Ligjin e Arsimit të Lartë, prandaj po keqpërdor çdo mashë të tij për ti vënë kapak kësaj proteste që e turbulloi jo pak./lapsi/
