Nga Boldnews.al
Gjykata Administrative, në dy procese të ndryshme gjyqësore, ka shpallur të paligjshëm vendimet e Prokurores së Përgjithshme të Përkohshme, Arta Marku, për transferimin e disa prokurorëve të Krimeve të Rënda.
Në një vendim të pak ditëve më parë, gjykata administrative vendosi të shpallte të paligjshëm urdhërin e Arta Markut për “transferimin” e prokurorit Ols Çela nga Krimet e Rënda në atë të Beratit.
Mesditën e së Mërkurës, një tjetër trupë gjykuese, shpalli gjithashtu të paligjshëm “transferimin” në prokurorinë e Pogradecit të i ish-drejtuesit të Krimeve të Rënda, Besim Hajdarmataj.
Prokurorja Sonila Muhametaj, e cila u transferua në mënyrë anti-ligjore në Pukë, u tërhoq nga padia e saj, pak para se të jepej vendimi. Prokurorja e mori këtë vendim pasi Kryeprokurorja e Përkohshme, Arta Marku, vendosi të tërhiqej nga “internimi”, duke e caktuar Muhametajn të ushtrojë funksionin në prokurorinë e Tiranës.
Tre prokurorët ishin pjesë e një debati ligjor dhe procedurial të zhvilluar në mesin e Shtatorit në Prokurorinë për Krime të Rënda. Disa prej prokurorëve u përplasën me drejtuesen e tyre, Donika Prela, për shkak të një procedure të paligjshme që ajo kishte vendosur të zhvillonte për çështjen “Shullazi”.
Në këtë debat ndërhyri Kryeprokurorja e Përkohshme, Arta Marku, e cila urdhëroi nisjen e hetimit disiplinor për 10 prokurorë, ndërkohë që për tre prej tyre vendosi “transferimin”.
Prokurorët “e transferuar” përmes procedurës anti-ligjore e ankimuan urdhërin e Arta Markut në Gjykatën Administrative. Kjo e fundit, pasi shqyrtoi ankesat e prokurorëve Ols Çela e Besim Hajdarmataj, konstatoi se vendimet e Kryeprokurores së Përkohshme ishin tërësisht në kundërshtim me ligjin.
Mandati 1-vjeçar i Arta Markut në krye të Prokurorisë Shqiptare është karakterizuar nga përplasjet me prokurorë të ndryshëm. Ajo u zgjodh në krye të institucionit të Akuzës, vetëm me 69 votat e maxhorancës socialiste, në një seancë të zhurmshme, në Dhjetor të vitit 2017.
Pasi mori mandatin, ajo nisi lëvizje të shumta në radhët e prokurorëve, përkundër asaj që kishte premtuar në Parlament se do të “vendoste rregull” në institucion. Lëvizja më e komentuar ishte transferimi i prokurorit Hajdarmataj për në Pogradec.
Hajdarmataj ishte prokurori që drejtonte hetimet kundër ish-ministrit të Brendshëm, Saimir Tahiri, si edhe kundër disa grupeve kriminale, të cilët dyshohet se kanë bashkëpunuar me zyrtarë të niveleve të larta.
Aktualisht, Kryeprokurorja e Përkohshme nuk i ushtron më kompetencat, të cilat ia kishte uzurpuar Këshillit të Lartë të Prokurorisë (KLP). Pak ditë më parë u konstituua KLP, e cila ka përgjegjësinë për emërimin, transferimin dhe penalizimin e prokurorëve.