Në një deklaratë të shpërndarë për mediat, kryetari i Partisë Demokratike, Lulzim Basha në emër të forcës politike që drejton dhe të opozitës shqiptare, ka shprehur mbështetjen për shpalljen “non grata” dhe dëbimin e diplomatëve iranianë.
Në deklaratë thuhet se, veprimtaria e tyre cënon “statusin diplomatik” dhe vë në rrezik sigurinë kombëtare.
“Partia Demokratike kërkon prej strukturave shtetërore të Sigurisë Kombëtare, përkushtim të qëndrueshëm dhe bashkëpunim të sinqertë e pa zvarritje me aleatët strategjikë si e vetmja garanci për parandalimin dhe neutralizimin e aktiviteteve te tilla ne territorin e RSH,” – shkruhet në deklaratë.
Sipas Bashës, lufta kundër terrorizmit kompromentohet kur ngjashëm nuk zhvillohet luftë pa kompromis ndaj krimit të organizuar brenda vendit.
Kujtojmë se më herët vendimin e kryeministrit Rama për të dëbuar diplomatët iranianë e kanë komentuar edhe anëtarë të tjerë të opozitës, ndër ta edhe ish-kryeministri Berisha dhe kryetari i grupit parlamentar i LSI-së Petrit Vasili.
Ata e kanë konsideruar këtë vendim si të drejtë por edhe të vonuar.
Deklarata e Bashës:
Deklaratë e kryetari te Partisë Demokratike, Lulzim Basha
Në emër të Partisë Demokratike dhe opozitës shqiptare, shpreh mbështetjen për shpalljen “non grata” dhe dëbimin e diplomatëve iranianë, me veprimtari në cenim të “statusit të diplomatit” dhe që vë në rrezik Sigurinë Kombëtare.
Partia Demokratike kërkon prej strukturave shtetërore të Sigurisë Kombëtare, përkushtim të qëndrueshëm dhe bashkëpunim të sinqertë e pa zvarritje me aleatët strategjikë si e vetmja garanci për parandalimin dhe neutralizimin e aktiviteteve te tilla ne territorin e RSH.
Lufta kundër terrorizmit si formë e krimit të organizuar ndërkombëtar, kompromentohet kur ngjashëm nuk zhvillohet luftë pa kompromise ndaj krimit të organizuar brenda vendit.
Çdo bashkëjetesë shtetërore me krimin e organizuar është kompromentim i luftës ndaj terrorizmit.
