Nga Boldnews.al
Një njësi shërbimi në proces legalizimi në Ksamil është shkatërruar tërësisht mëngjesin e së Martës nga një shpërthim tritoli, pak ditë pasi një tjetër ndërtim aty pranë u shkatërrua plotësisht nga zjarri.
Disa persona, ende të paidentifikuar zyrtarisht nga Policia, por të njohur nga banorët e Ksamilit, kanë vendosur të bëjnë “gjyqësi popullore”, duke prishur, për interesa personale, pronat e personave të ndryshëm.
Gjatë javëve të fundit, banorët e qytezës në Jug të Shqipërisë po përballem me një situatë absurde, ku, ndërtesa shërbimi publik, në pritje të legalizimit, po shkatërrohen përpara syve të autoriteteve publike dhe askush nga institucionet zyrtare nuk reagon.
“Boldnews.al” ka siguruar fotot e ndërtesës së thjeshtë, të shkatërruar mëngjesin e së martës pas shpërthimit të një sasie tritoli. Banorët e Ksamilit janë të bindur se ky shpërthim ka lidhje me një tjetër shkatërrim godine me zjarr, ndodhur pak ditë më parë.
“Boldnews.al” raporti rreth dy javë më parë për shkatërrimin me zjarr të objektit të ndërtuar nga Abdullah Skënderi. Për këtë ngjarje, Skënderi ka denoncuar në prokurori shtetasin Evo (Spiro) Iljadhi. Sipas denoncimit, një kopje të të cilit e posedon edhe “BN”, në orën 8 të mëngjesit të datës 7 Dhjetor 2018 “njoftohem se persona të paidentifikuar, si edhe një person i quajtur Evo (Spiro Iljadhi), i cili ka në pronësi lokalin “Orange”, i janë afruar pronës sime dhe i kanë vendosur zjarrin, duke e shkatërruar komplet atë, me të gjithë mallin që kishte brenda. Dëmi që më është shkaktuar është i konsiderueshëm në vlerë monetare, pasi aty mbaja dhe furnizimet e punës. Gjithashtu, për shkatërrimin e pronës sime kanë përdorur edhe skrep”.
Gjithashtu, në atë kallëzim, Abdullah Skënderi denonconte edhe mungesën e reagimit të strukturave policore, duke hedhur dyshimin se shkatërruesi i pronës së tij ka lidhje me zyrtarë të uniformave blu të Ksamilit dhe Sarandës.
Një situatë thuajse e ngjashme është përsëritur mëngjesin e së Martës, kur një tjetër njësi shërbimi është rrafshuar me tritol. Edhe për këtë rast, banorët e Ksamilit dyshojnë se është kryer nga i njëjti grup personash. Këta të fundit kanë marrë në dorë “gjyqësinë private”, duke shkatërruar ndërtimet që janë në proces legalizimi në zonë, duke iu paraprirë vendimeve të institucioneve shtetërore.
Sipas banorëve, qëllimi i këtyre shkatërrimeve me mënyra të rrezikshme për jetën dhe shëndetin e qytetarëve, është lirimi i hapësirave për ndërtime private nga personat që i marrin përsipër këto akte vandale. Gjithashtu, banorët dyshojnë se personat kanë siguruar mbrojtje nga ana e strukturave ligjzbatuese, të cilat nuk kanë reaguar thuajse fare pas këtyre ngjarjeve.
Për të dy rastet, nuk ka pasur asnjë njoftim zyrtar nga ana e Policisë së Shtetit. Madje, banorët, me nota humori të zi shprehen se Ksamili duhet t’i ketë kaluar si territor Greqisë, pasi asnjë autoritet shqiptar nuk interesohet për çfarë po ndodh së fundmi në qytezë.
