Nga Boldnews.al
Kryetari i Gjykatës Kushtetuese, Bashkim Dedja, u shkarkua nga detyra në përfundim të procesit të Vetingut të zhvilluar në Kolegjin e Posaçëm të Apelimit. Dedja, në pozicionin e kreut të Kushtetuese, ka pranuar të përdoret në mënyrë të përhershme nga kryeministri Edi Rama, me shpresën se do të dilte pa probleme nga procesi i Vetingut.
Bashkim Dedja, një gjyqtar me rreth 20 vite përvojë në sistemin e drejtësisë, u emërua anëtar i Gjykatës Kushtetuese në vitin 2010. Ai u zgjodh edhe kryetar i kësaj gjykate në vitin 2011, detyrë që vijonte ta mbante deri ditën e Hënë, kur edhe u shkarkua nga Kolegji i Posaçëm i Apelimit.
Ai i shërbeu “me devotshmëri” kryeministrit Edi Rama, sidomos sa i përket angazhimit të tij për lënien në fuqi të ligjit të Vetingut, si edhe vendimit për koncensionin e lojërave të fatit.
Pas miratimit të ligjit të Vetingut, shoqatat e gjyqtarëve dhe prokurorëve ankimuan në Gjykatën Kushtetuese pjesë të rëndësishme të tij, duke i konsideruar si antikushtetuese. Ligji për Vetingun ishte “kali i betejës” së qeverisë së Edi Ramës. Pavarësisht problematikave të shumta që ka ky ligj, Bashkim Dedja, në cilësinë e kreut të Kushtetueses, u angazhua personalisht që të bindte gjyqtarët e tjerë për të votuar pro variantit të ligjit të qeverisë.
Me ndërhyrjen e tij, ligji për rivlerësimin kalimtar të gjyqtarëve e prokurorëve, nuk u rrëzua. Dhe, tashmë, nga ky ligj, Bashkim Dedja u shkarkua edhe vetë.
Në korrik të vitit 2018 ai u konfirmua në detyrë nga shkalla e parë e Vetingut, Komisioni i Pavarur i Kualifikimit (KPK), pavarësisht problematikave të shumta me pasurinë e tij. Pas vendimi të parë, Dedja, në një takim me gazetarë, e konsideroi procesin e Vetingut si “të kalosh varrin për së gjalli”.
Vendimi i KPK u ankimua nga Komisioneri Publik, me rekomandimin e Operacionit Ndërkombëtar të Monitorimit. Pas shqyrtimit, Kolegji i Posaçëm i Apelimit arriti në konkluzionin se Bashkim Dedja nuk arriti në nivel të pranueshëm besimi përsa u përket burimeve financiare të pasurisë së tij. Për këto arsye, Kolegji i Apelimit vendosi shkarkimin e tij nga detyra.
Bashkim Dedja bëhet kështu zyrtari i radhës, i cili i besoi kryeministrit Edi Rama dhe zhgënjehet në mënyrë spektakolare prej tij. Tashmë, Dedja i bashkohet listës së gjyqtarëve e prokurorëve të shkarkuar, disa prej të cilëve kishin shpresë tek ndërhyrja e Edi Ramës. Ky i fundit, vijon të jetë ende kryeministër dhe, në takimet e ardhshme me zyrtarët europianë, do ta konsiderojë fitore shkarkimin e kreut të Gjykatës Kushtetuese.
