Për të disatën ditë radhazi, banorët e Bregut të Lumit kanë dalë sërish pasditen e sotme në protestë, ku kërkojnë shpronësim nga qeveria, janë prekur nga ndërtimi i Bulevardit të Ri.
Protestës së tyre i janë bashkuar edhe deputetët e opozitës, të cilët akuzojnë qeverinë për tendera korruptivë.
Banorët u shprehën se do mbrojnë pronën e ndërtuar me djersën e tyre, ndërsa i kanë kërkuar kryeministrit ballafaqim, ku nuk munguan as sfidat e drejtpërdrejta ndaj tij.
“Nëse është burrë kryeministri le të vijë e të ballafaqohet. Pa popull nuk ka kryeministër. Kryeministri pa taksat tona nuk jeton dot. Këto shtëpi i kemi ngritur me gjak, me djersë rrugëve në emigracion”, thanë banorët ndërsa shtojnë se nuk janë kundër projektit por se duan shpronësim dhe dëmshpërblim.
Deputeti i PD, Klevis Balliu i pranishëm në protestë garantoi banorët për mbështetjen e kësaj force dhe kreut të saj.
“Dua tju shpreh mbështetjen e PD dhe lidershipit të saj Lulzim Basha. Keni plot 12 ditë që jeni këtu dhe nuk po kërkoni asgjë më shumë e asgjë më pak se një takim me ata njerëz që paguhen me taksat tuaja. Ata njerëz që e kanë detyrim të përgjigjen.
PD nuk do lejojë që paratë e qytetarëve shqiptarë të vidhen dhe të futen në xhepat e qeveritarëve. Fakti që nuk vijnë t’ju takojnë tregon se shteti ka rënë, sistemi ka rënë.
Dua tju kërkoj që të bashkoheni me studentët, me fëmijët tuaj që i kthyen shpresën këtij vendi dhe bashkë me ta të rrëzoni qeverinë e krimit.
Të gjithë ju keni një të përbashkët, kundërshtarin. Ai është korrupsioni, vjedhja, Edi Rama. Vazhdoni, qëndroni, ne do të na keni këtu”, deklaroi Balliu.
Banorët paralajmëruan se do t’i bashkohen protestës së studentëve, pasi sipas tyre qëllimi është i njëjtë.
“U bëj thirrje banorëve tu bashkohemi protestës së studentëve. Nesër do u bashkohemi studentëve. Jemi të gjithë për një qëllim.”, – thanë ata.
