Protesta e studentëve futet sot në ditën e saj të 11-të dhe si duket ata as nuk kanë ndërmnd të dorëzohen deri në plotësimin e tetë kërkesave të tyre ndaj qeverisë.
Ditën e djeshme ata kanë lajmëruar për sot hapjen e protestës ku ftojnë të gjithë qytetarët e Shqipërisë pa dallim, t’ju bashkohen atyre mjafton që të mos shpalosin flamuj dhe banderola politike përvec flamurit kombëtar.
Protesta e studentëve ka ngjallur reagime të shumta në opinionin publik ku dominon mbështetja ndaj tyre nga shoqëria në tërësi por edhe nga personazhe të njohura të artit, kulturës, gazetarisë, politikës etj, ku një pjesë e tyre pritet t’i bashkohen protestës së sotme përpara kryeministrisë.
I fundit ka qenë këngëtari i njohur, Renis Gjoka i cili përmes një postimi në rrjetet sociale, duke shpërndarë njëkohësisht edhe lajmërimin e studentëve për protestën e sotme në orën 10:00 përpara kryeministrisë, ka shkruajtur se, “Aty do të më keni”.
Më herët moderatorja e njohur, Roza Lati është shprehur se ajo është me studentët. Ajo shkruan: “Unë jam me studentët, kam shpirt rebel për vete, e meritojnë”.
Edhe personazhi i mirënjohur i ekranit, Robert Aliaj ka deklaruar vazhdimisht mbështetjen e tij ndaj studentëve ku edhe është parë përkrah tyre në protestën përpara Ministrisë së Arsimit duke mbajtur një fjalim si edhe ka recituar me ta tekstin e këngës me të cilën mori pjesë në festivalin e “Kënga Magjike”.
Neritan Liçaj në fjalën e tij përpara studentëve pak ditë më parë u bëri thirrje atyre që të bashkohen të gjithë kundër kësaj qeverie antikombëtare dhe të papërgjegjshme.
“Ju jeni e ardhmja. Kjo qeveri është antikombëtare, qeveri e papërgjegjshme që nxjerr ligje kundër qytetarëve. Duhet të mblidhemi të gjithë dhe të dalim para Kryeministrisë për të protestuar”, – është shprehur Liçaj.
Gjithashtu profesori dhe shkrimtari i njohur, Edmond Tupja, u ka bërë thirrrje vazhdimisht studentëve që të mos ndalen.
“Studentë dhe studente të mitë, ky është vetëm fillimi. Vazhdoni luftën”, – inkurajoi Tupja protestuesit e shumtë, që brohorisnin.
