Burimet pranë Partisë Demokratike kanë bërë me dije se deputetja Rudina Hajdari nuk ka folur në emër të PD në Kuvend, është në shkelje të vendimit të grupit parlamentar të PD.
Deklarata e saj në foltoren e Kuvendit u bë ndërsa deputetët e opozitës u larguan nga sallal.
Kanë qenë vetëm anëtarët e Komisionit të Edukimit dhe Medias nga PD dhe LSI që do ti drejtoheshin foltores për të mbajtur një qëndrim në mbështetje të protestës së studentëve dhe kundër ligjit për arsimin e lartë.
Por një reagim në fb, Hajdari shprehet: “Nuk e theva unë rregullin, rregulli u thye që në 10 të mëngjesit, me ardhjen e opozitës në Kuvend. Unë thjesht bëra detyrën time”.
Sjellja e deputetes Hajdari është në vijimësinë e deklaratave të mëparshme.
Me 8 dhjetor, në ditën e Rinisë, ajo deklaroi se është e gatshme të lërë mandatin e deputetes për t’iu bashkuar studentëve.
Një ditë më vonë përmes një statusi në fb, ajo shkoi më larg, duke u shprehur se distancohet nga PD dhe nuk mund ta shohë veten si pjesë e kësaj force politike pasi ajo nuk ngjall besim dhe mbështetje te qytetarët.
Nën rreshta ajo nënkuptoi një lëvizje përtej forcave politike tradicionale shqiptare.
Por mbetet për tu parë se cili do të jetë qëndrimi i PD, pasi në raste të tilla ka pasur dhe përjashtime të deputetëve.