Nga Boldnews.al
Edi Rama u soll si një “aktor” i vërtetë në studion e Alban Dudushit, i cili, së bashku me drejtuesit e Top Channel, iu përulën deri në shëmti kryeministrit, duke i siguruar që të flistet me ‘studentë të sajuar”, të cilët në fakt ishin freshistë dhe punonjës të administratës së tij.
“Boldnews.al” ka identifikuar disa nga “studentët”, të cilët janë pjesë e strukturave të Partisë Socialiste. Pjesa e parë e emisionit u bazua në një monolog të kryeministrit, pas një gjysëm-pyetje të një djaloshi, që u prezantua si student masteri në Fakultetin e Arkitekturës.
Ai quhet Marjo Hysenlliu, zyrtar në administratën e Damian Gjiknurit në Ministrinë e Infrastrukturës. Ky “student i shtirur”, siç tregohet edhe në fotot që shoqërojnë këtë shkrim, duket shumë i kënaqur në foto të ndryshme me Edi Ramën e Erion Veliaj.
Po ky nuk është i vetmi “aktor” përballë Ramës. Në krah të tij, në studion e Dudushit, qëndronte një vajzë simpatike, e cila e mbështeste me tundje koke si kryeministrin, ashtu edhe Hysenlliun.
Vajza quhet Anxhela Bakiasi, një prej bukurosheve që pak kohë më parë mori pjesë në programin “FRESH-Voice” të Partisë Socialiste. Në fotot që ka siguruar “Boldnews.al”, ajo duket e lumtur në podiumin rozë të partisë në pushtet.
Përballë këtij “paneli” të sajuar, kryeministri Rama mori pozat e një show-man-i, duke u ulur e ngritur në studion e Top Channel-it, e duke hapur duar e këmbë gjatë prezantimit të argumentave të ripërsëritur dhe bajate të këtyre ditëve të fundit.
Emisioni Top Show, i cili mori përsipër të përballte Edi Ramën me studentët, u ironizua gjatë gjithë ditës së martë, për shkak të organizimit partiak që përgatitën drejtuesit e televizionit dhe stafi i propagandës qeveritare. Pasi dështuan për të siguruar përballjen reale të Ramës me studentët, televizioni dhe PR-i i kryeministrit sajuan këtë emision të shëmtuar, me rrogëtarë të tyre, të cilët i shitën si protestues.