Portalet vegla pranë Qeverisë publikuan pasditen e sotme një “bisedë” në WhatsApp, ku gjoja janë duke biseduar deputetë të PD. Fotomontazhi shitet si diversion i maxhorancës për të krijuar idenë se protestat e studentëve i ka organizuar PD.
Sipas kësaj bisede të sajuar, del se protestuesit i kanë ngritur në këmbë Flamur Noka dhe Grida Duma.
Por pas shpërndarjes së këtij mesazhi, ka ardhur edhe reagimi i PD. Selia blu thotë se biseda e publikuar është fotomontazh i përgatitur në zyrën e Ramës.
Njoftim zyrtar nga PD:
Mediave u është shpërndarë nga qeveria një fotomontazh me emrat e disa drejtuesve të PD. Fotomontazhi ka për qëllim të tregojë se në PD është ngritur një grup që koordinon protestën e studentëve.
Kjo është një sajesë e propagandës banale të Edi Ramës, i kapur nga paniku për shkak të protestave në të gjithë Shqipërinë. Jemi në dijeni se po ju bëhet presion për ta publikuar, por është në nderin tuaj, të mos bini pre e mashtrimit të trashë qeveritar.
Ju keni çdo mundësi të bëni verifikimin tuaj të pavarur për të provuar se ky është fake news.
