Nga Boldnews.al
Prej një muaji, vendi është përfshirë nga protesta të cilat në thelb kundërshtojnë keqqeverisjen dhe arrogancën që ka përfshirë qeverinë Rama 2. Por nëse banorëve të Shkozës, Bregut Lumit apo Astirit media ja ka dalë me sukses ti censurojë, këtë gjë nuk mundi ta bënte dot me studentët të cilët me protesta të thjeshta arritën prej disa ditësh të mbajnë të mbërthyer në zyrë Lindita Nikollën.
Mediat nuk mundën ta censuronin këtë protestë edhe pse disa prej tyre vazhdojnë të prodhojnë lajme se po ulet numri i protestuesve në shesh. Të mos pasqyrosh problemet, hallet e njerëzve dhe të mos bësh gazetari sociale do të thotë ta humbësh misionin e gazetarisë dhe të shndërrohesh në sahanlëpirës të pushtetit.
Lista kryesohet nga televizionet kombëtare në vend të cilat japin në lajme çdo lloj inagurimi, barcalete apo çmendurie të të parit të vendit, por nuk i janë përveshur pasqyrimit të të rinjve të cilët duket se nën frymëzimin e Parizienëve po shkallmojnë gërmadhat e një qeverie e cila po grabit çdo qindarkë të shqiptarëve për t’i ndarë ato me oligarkët klientë dhe një grusht njerëzish të cilët me pronësi në media ose jo, zanatin e tyre të grabitësit e bashkërendojnë kaq mirë me qeveritarët tanë.
Një tjetër Italian, i përfolur si i lidhur me klanet mafioze Pulieze, vjen dhe bëhet pjesë e propagandës qeveritare duke hedhur herë pas here lajme të cilat nuk i shërbejnë studentëve, rinisë dhe demokracisë shqiptare. Të gjithë këta kanë një gjë në thelb, i kanë duart e lyera me gjakun e shqiptarëve që janë vetëvrarë për shkak të varfërisë.
Sidoqoftë, studentët dhe çdo njeri tjetër në këtë vend, duhet të bëjnë atë që kanë mundësi të bëjnë. T’i bojkotojnë ekranet televizive të përlyera me korrupsionin qeveritar. Të bojkotojnë pseudo artistët dhe pseudo gazetarët me emisionet e tyre që na japin një realitet të rrejshëm të Shqipërisë.
Janë me dhjetëra emisionet televizive që ndajnë para që qajnë halle personale të njerëzve që përmendin dhjetë herë në çdo transmetim kryebashkiakun ose kryeministrin sepse ushqehen, marrin para në të zezë dhe në të bardhë nga këta të fundit. Këto emisione na thonë se Shqipëria është një vend normal demokratik, jo i marrë peng nga krimi, jo në duart e oligarkisë, jo të një klase kastë politike e cila po gllabëron gjithçka.
Në këto kushte të gjithë kemi në dorë t’i bëjmë unfollow dhe unlike profilet publike prej qindra-mijëra ndjekësish të lëtyrave që jetojnë në kurrizin e Shqipërisë.
Hiqini nga memoria e televizorit tuaj ato stacione televizive që nuk transmetojnë dhe nuk raportojnë protestën. Largohuni nga faqet e tyre në rrjetet sociale. Bojkotojini kudo. Mos shkoni në qendrat tregtare, mos blini në dyqanet e tyre, mos i përshëndesni as mirmëngjes kur t’i shihni në rrugë. Bojkotojini dhe do shihni sa të mjerë janë.
