Nga Boldnews.al
Gjyqtarja e Apelit të Tiranës, Flutura Skënderi nuk dallon nga shumë kolegë të saj, të cilët duket se e kanë ndarë kohën e tyre ndërmjet sallës së gjyqit dhe procesit të kthimit të pronave të saj, proces nga i cili rezultojnë shumë më të pasur se sa në fillimet e karrierës së tyre në gjyqësor.
Flutura Skënderi ka nisur karrierën e saj në gjyqësor në vitin 1994 dhe ka deklaruar pasurinë për herë të parë në vitin 2003, kohë kur hyri në fuqi ligji “Për deklarimin e pasurive…”.
Fillimisht, gjyqtarja Skënderi rezulton me një pasuri modeste, një apartament 1+1 në Tiranë, një automjet në emër të bashkëshortit, si edhe bashkëpronare e një trualli 180 m2, ku, siç deklaron në formularët e pasurisë, zotëron 1/20 pjesë, pra, 6 m2.
Në vitin 2004, sipas deklaratave të pasurisë të publikuara në “opendata.al”, gjyqtarja Skënderi ka marrë një kredi 18 mijë euro për të paguar programin master të vajzës. Një vit më pas, në 2015, ajo deklaron se e ka shlyer plotësisht këtë kredi. Ka një non-sens logjik dhe financiar në mënyrën se si ka arritur të shlyejë gjyqtarja shumën prej 18 mijë eurosh në një kohë shumë të shkurtër.
Të ardhurat familjare, të deklaruara prej vetë saj, arrijnë pak a shumë në vlerën e kredisë. Por, nëse të gjithë të ardhurat kanë shkuar për shlyerje kredie, atëherë rezulton se familja Skënderi nuk duhet të ketë kryer asnjë shpenzim për ushqyerje dhe për nevojat e përditshmërisë.
Për më tepër, në dy vitet 2004-2005, kur ka shlyer kredinë 18 mijë euro, gjyqtarja jo vetëm që nuk rezulton të jetë shtrënguar financiarisht, por ka arritur të kursejë edhe 600 mijë lekë të reja.
Në vitin 2006, gjyqtarja Skënderi rezulton se ka mbetur edhe pa shtëpi. Apartamentin që e kishte deklaruar në formularin e parë, deklaron se e ka shitur 5 milion lekë (të reja). Në formularin e pasurisë së publikuar nuk jepet asnjë e dhënë se ku ka qëndruar ajo së bashku me familjen, pasi ka shitur shtëpinë. Por, në deklaratën e pasurisë shkruhet se, rreth 800 mijë lekë nga shitja e shtëpisë i ka shpenzuar për blerje automjeti, ndërsa pjesën tjetër e ka mbajtur në shtëpi, pra rreth 4.2 milion lekë (të reja).
Një vit më pas, në deklaratën e pasurisë shfaqet një tjetër truall, me sip.225 m2, të cilën gjyqtarja e ka në bashkëpronësi dhe e ka përfituar me vendim të Agjencisë së Kthimit dhe Kompensimit të Pronave.
Ky truall i është dhënë për ndërtim një kompanie. Gjyqtarja Skënderi, në bazë të përqindjes që zotëron në pronësi, nënshkruan një kontratë sipërmarrje për një apartament 107 m2, nga të cilat 57 m2 i takojnë si pronare, ndërsa pjesën tjetër, do t’i blejë kur të ndërtohet godina. Edhe këtë vit nuk deklaron se ku ka banuar.
Në vitin 2008, “më në fund”, gjyqtarja Skënderi bëhet me shtëpi. Godina e dhënë me kontratë sipërmarrje përfundon dhe ajo përfiton apartamentin 107 m2, duke paguar edhe pjesën shtesë. Këtë pagesë, gjyqtarja deklaron se e ka realizuar duke zeruar gjendjen cash të deklaruar më parë (4.2 milion lekë), si edhe ka marrë një kredi 800 mijë lekë.
Në vitin 2009, gjyqtarja deklaron se ka nënshkruar një kontratë sipërmarrjeje, nga e cila do të përfitoj një apartament 120 m2. Duke ndjekur logjikën e deklaratave të pasurisë, rezulton që ky të jetë një apartament i dytë, i përfituar në të njëjtin truall, i cili është dhënë me kontratë sipërmarrjeje për ndërtim godine.
Pas disa viteve “rutinë”, gjyqtarja deklaron në vitin 2005 se ka përfituar 5 milion lekë, si kompensim për pronën, e njohur si bashkëpronare në një vendim të vitit 1994.
