Çështja e banorëve të Astirit tani më është kthyer në kryefjalë të ditës, pasi banorët çdo ditë e më shumë nuk tërhiqen nga protestat dhe kërkesat e tyre. Nazif Lekli, banor i zonës në një pronocim për gazetarin Ermal Rizaj në Syri.net është shprehur se së fundmi i ka ardhur një letër nga Aluizmi, ku thotë se biznesi I tij që është në proçes legalizmi është skualifikuar.
Lekli tha: “Shtëpinë dhe biznesin që kam hapur që në vitin 1996, i kam hedhur për legalizim në vitin 2005. Tokën e kam blerë sipas rregullave dhe ligjeve me pronar të ligjit 7501. Unë prisja që ta merrja, sepse në 17 janar i bëmë një rifreskim dokumentacionit komplet. I futëm të gjitha letrat dhe është gati që ta merrni.”
Lekli shprehet se në fillim të 2018 Ministria e Drejtësisë ka urdhëruar Drejtorin e Aluizmit që biznesin I tij të pajiset me çertifikatë pronësie, por kjo gjë nuk ka ndodhur.
Lekli: “Ministrisë së Drejtësië i kam bërë një ankesë që të përshpejtohet procesi i legalizimit. Më thanë që shumë shpejt duhet ta merrni lejen e legalizimit, sepse toka është e juaja. Gjithë procedurat ligjore janë në fuqi dhe të dyja objektet janë paralel.”
Ai deklaron se kjo letër, e cila I ka ardhur pasditen e 29 nëntorit është e paqartë pasi përveç emrit të tij, në kërkesën e dërguar ka edhe një emër tjetër.
“Dje erdhi letra që ju skualifikoni. Dhe më e forta, emri është imi dhe aty del një emër tjetër. Nga nxitimi që kanë bërë , se janë nxituar që sa më shpejt t’u çojmë letrat që skualifikoheni, këta kanë sjellë këtë letër ku thonë se pas gjithë procedurave, “kërkohet përjashtimi i objektit informal nga procesi i legalizimit për subjektin Enver Shukri Pira! Se çfarë është kjo, s’e di!”
Sipas Leklit këto veprime që po bën qeveria janë të jashtëligjshëme, pasi banorët e Astirit nuk po njoftohen me letër zyrtare se për çfare do ju prishen banesat.
“Ne në radhë të parë kërkojmë letrat nga ARRSH. Siç na ka sjellë për skualifikimin, le të na sjellë edhe për banesat që do të prishen. Po nuk sollën letrën, ta harrojnë…mund të vijnë me dhunë me polici, por ne thamë të bëjmë si njerëz.”
Sakaq, banori I zonës së Unazës së Re tha se protestat do të vazhdojnë derisa qeveria të gjej një zgjidhje tjetër, dhe jo këtë të nxjerres së qytetarëve në mes të katër rrugëve.
