Partia Demokratike ka vazhduar edhe sot akuzat ndaj kryebashkiakut të Durrësit, Vangjush Dako.
Duke pasur si referencë dosjen 339, selia blu kërkon arrestimin e Vangjush Dakos, pasi është koka e grupit të vjedhjes së votave në qarkut e Durrësit.
Gjatë një deklarate për mediat, deputeti i PD-së Flamur Noka nga selia blu është shprehur se përgjimet e muajit shkurt 2017 dhe falënderimet e Dakos pas zgjedhjeve ndaj grupit Avdylaj janë provat më të qarta se kryebashkiaku i Durrësit ka blerë dhe ka mbledhur vota me kriminelë.
Deklarata e deputetit të PD, Flamur Noka:
Dosja 339 është prova e krimit elektoral të Vangjush Dakos, i cili bashkëpunoi me bandat për të blerë pushtetin ilegjitim të Edi Ramës.
Në dosjen 339, të cilën Edi Rama po e mban të kyçur në sirtarët e Prokurorisë ekzistojnë me qindra faqe përgjime që provojnë se Vangjush Dako ishte në krye të operacionit kriminal për blerjen e votës në Qarkun e Durrësit dhe kërcënimit të votuesve nëpërmjet bandave.
Për këtë krim Kryetari I Bashkisë së Durrësit duhet të arrestohet!
Heshtja e prokurorisë, nën kontrollin e plotë të Edi Ramës, mund ta ndihmojë sot për sot Vangjush Dakon, por askush dhe asgjë nuk do ta shpëtojë nga ndëshkimi për krimin e blerjes së pushtetit me bandat.
Dosja 339 është simboli që ka zbuluar skemën e përdorur nga Edi Rama në të gjithë Shqipërinë, për të grabitur vota me ndihmën e kriminelëve, në këmbim të favoreve në prona, tendera publikë dhe lehtësi në marrëdhënie me policinë.
Kjo skemë provohet nga përgjimet e bëra publike deri tani:
• Biseda telefonike e shkurtit, me Altin Avdylajn, i njohur si Niçja, ku i premton dhe favore, e provon këtë.
• Falenderimet pas zgjedhjeve të datës 27 Qershor, po me Niçen për të falenderuar kryekapobandën Astrit Advylaj, e provojnë këtë.
• Mesazhet me Cinen, Jasin Avdylin për të ndërhyrë tek FNSH-ja dhe komunikime të tjera të zbardhura në dosjen 339, e provojnë këtë.
Mos arrestimi iVangjush Dakos është dëshmia më e qartë e kapjes së shtetit nga krimi i organizuar me mbështetje të organizatës kriminale të Rilindjes të drejtuar nga Edi Rama.
Në Shqipëri nuk ka për të patur as drejtësi, as luftë kundër krimit dhe asnjë zhvillim normal pa u ndëshkuar krimi elektoral që mban në pushtet qeverinë ilegjitime të Edi Ramës!
