Rruga Thumanë-Kashar do t’u kushtojë qytetarëve shqiptarë 54.4 miliardë lekë duke përfshirë tatimin mbi vlerën e shtuar.
Qeveria ka bërë për herë të parë publike faturën e çmendur të koncesionit për ndërtimin e rrugës e rrugës me të shtrenjtë në vend.
Sipas dokumenteve, që Ministria e Financave ka dërguar bashkangjitur projektbuxhetit të vitit 2019, aksi me gjatësi vetëm 20.8 kilometër do të kushtojë plot 435 milionë euro duke përfshirë tatimin mbi vlerën e shtuar, shkruan syri.net
Nëse zbritet TVSH, e cila i rikthehet shtetit, atëherë fatura neto e rrugës do të jetë rreth ose 362 milionë euro ose e thënë ndryshe 17.4 milionë euro për çdo kilometër.
Ky është një rekord absolut.
Për krahasim, Autostrada Durrës-Kukës, një segment 110 kilometra i gjatë ka kushtuar në total 1.2 miliardë euro ose përafërsisht 11 milionë euro për kilometër.
Rruga Thumanë-Kashar do të ndërtohet me koncesion nga kompania Gener 2. Kjo kompani do ta ndërtojë rrugën me paratë e veta dhe do ta mirëmbajë atë për 13 vjet.
Në këmbim qeveria do t’i paguajë Gener 2 plot 362 milionë euro me këste të barabarta për 13 vjet.
Vet Ministria e Infrastrukturës nuk e ka njoftuar ende publikisht përfundimin e negociatave dhe vlerën përfundimtare të saj. Por edhe pse nuk është bërë zyrtare, shifra e publikuar nga Ministria e Financave në dokumentet bashkangjitur projektbuxhetit mësohet se është vlera përfundimtare e rënë dakord mes qeverisë dhe koncesionarit privat.
Qeveria është justifikuar se një pjesë e rritjes së kostos është e lidhur me mirëmbajtjen e rrugës për 13 vjet nga konçesionari.
Por sërish shifra prej 17.4 milionë euro përbën një rekord jo vetëm në Shqipëri, por edhe me gjerë. Me këtë kosto Thumanë-Kashar, bëhet kështu rruga e dytë më e shtrenjtë në Ballkan pas autostradës Bar-Moljare në Mal të Zi, që u ndërtua nga një kompani kineze.
