Një operacion i madh është ndërmarrë gjatë natës nga policia italiane. Flitet për 22 të arrestuar me kërkesë të Drejtorisë së Antimafias italiane e prokurorisë së Brescias.
Mes të arrestuarve është dhe biznesmeni shqiptar në Itali Gëzim Sallaku, presidenti i klubit të futbollit Darfio, shkruan Bresciatoday.it.
Media italiane shkruan se në pranga kanë rënë 4 vëllezërit Sallaku pasi i janë gjetur tre pistoleta që i mbanin pa leje. Nuk është e qartë ende lidhja mes personave të arrestuar por mësohet se policia ka ndërhyrë për të shkatërruar një organizatë kriminale të përbërë nga shqiptarë dhe italianë që merrej me trafikun e drogës në disa provinca në Itali.
Janë arrestuar vëllezërit Isuf, Taulant dhe Saimir Sallaku (ky i fundit disa jave me pare).
Pritet që të ketë një konferencë për median në orët në vijim.
***
17/Tetor 2018 / Arrestohet vëllai i biznesmenit, bosi i grupit të trafikut të heroinës
Zbardhen emrat e disa prej shqiptarëve të arrestuar disa ditë më parë në Itali, gjatë një aksioni që çoi në zbulimin e një rafinerie droge, ku u gjetën 12.5 kg heroinë.
Droga u gjet në një apartament pranë rrugës kryesore që kalon në komunën Osio Sotto (Bergamo). Sipas hetuesve, apartamenti përdorej për paketimin e drogës, që më pas shitej në rajonin e Val Camonica. Siç raporton “Corriere della Sera” këtë të mërkurë, nën shtrat u gjet një kuti brenda së cilës ishin 12.5 kg heroinë. Përveç heroinës, aty u gjet edhe një sasi e vogël kokaine dhe përzierës, si dhe pajisje që përdoroheshin për paketimin e drogës. Sipas karabinierëve, në laboratorin në rrugën “Trieste 3”, punonin dy shqiptarë me paketimin e drogës: Agim Bejko, 69 vjeç dhe i biri Enkelejd, 44 vjeç, të arrestuar të dy. Në operacionin që u zhvillua mes mbrëmjes së premtes dhe mëngjesit të një dite më pas, u arrestuan në total 9 persona, 5 shqiptarë dhe katër italianë.
Në krye të grupit të trafikut, sipas hetuesve, ishte shqiptari Saimir Sallaku, 44 vjeç, një emër i njohur për policinë italiane.
Pasi kishin marrë informacion se të premten do trafikohej një sasi e konsiderueshme droge, efektivët u zhvendosën në zonë. Vetëm në mbrëmje aty mbërritën dy makina. Dy shqiptarët, babë e bir me një bashkëpunëtor nga Milano i dorëzuan 1 kg e 40 kokainë Sallakut. Ky i fundit shkoi në një tjetër makinë që ndodhej aty pranë dhe takoi dy italianë nga Breshia, një 71-vjeçar dhe një 37-vjeçar, të cilëve u dorëzoi drogën dhe në këmbim mori 41 mijë euro.
Në këtë pikë, ndërhynë 10 karabinierët që ishin vendosur në zonë dhe arrestuar gjashtë personat: Sallakun, Agim e Enkelejd Bejkon dhe tre italianët. Në makinën e dy italianëve nga Breshia, agjentët gjetën edhe 26 mijë euro.
Hetimet u zgjeruan menjëherë me kontrollet e banesave të personave të arrestuar, në zonat e Bergamnos, Breshias e Milanos. Në një garazh në Piancogno (Breshia), gjetën 10 kg marijuhanë, duke arrestuar dy persona që përdornin garazhin. Një prej tyre raportohet se është një shqiptar me iniciale A.H., ndërsa tjetri një italian.
Personi i nëntë i vënë në pranga është pronarja e banesës në Osio Sotto ku u gjet heroina: Drita Selimaj, 68 vjeçe, e arrestuar, por më pas e lënë e lirë nën masën “arrest shtëpiak”.
Vëllai i biznesmenit
Saimir Sallaku, siç raporton “Corriere” është vëllai i biznesmenit dhe pronarit të klubit italian të futbollit “Darfo Boario Calcio”, Gëzim Sallaku.
Sipërmarrësi shqiptar u arrestua në shkurtin e 2016-ës së bashku me vëllezërit Saimir dhe Isuf Sallaku pasi akuzoheshin për evazion fiskal, por më pas u lanë të lirë. Në 2017-ën, Gëzim Sallaku fitoi edhe betejën në Gjykatën e Lartë italiane, që vendosi të heqë sekuestron nga asetet e tij, përfshirë dhe aksionet në klubin e futbollit Darfio si dhe apartamente e restorante në vlerën e 13 milionë eurove.
Nga një kërkim në Qendrën Kombëtare të Biznesit, rezulton se nën emrat Gëzim Sallaku dhe Saimir Sallaku, ka biznese të regjistruara edhe në vendin tonë.
I arrestuari i 10
Përveç nëntë personave të arrestuar, mediat italiane raportuan sot se, në pranga është vënë edhe një tjetër shqiptar, pasi kishte lidhje me grupin e drogës. Në banesën e tij në Calusco d’Adda (Bergamo), janë gjetur 50 kg marijuhanë.
