Kryeministri Edi Rama ka vendosur që t’i japë zgjidhje me VKM ngërçit të krijuar nga ana e presidentit Meta për mosdekretimin e Sandër Lleshit në postin e ministrit të Brendshëm. Rama i ka qendruar deri në fund zgjedhjes së tij për ministrinë e brendshme, duke ndjekur një manovër që ja lejon ligji.
Ai e ka propozuar fillimisht Lleshin si zëvendëministër të brendshëm dhe pas kësaj ai do të komandohet në krye të Ministrisë, sa kohë që nuk ka një emër tjetër të dekretuar.
Të njëjtën taktikë numri 1 i qeverisë ka ndjekur dhe në rastin e Helidon Bendos, kreut të komanduar të SHISH-it, i cili po ashtu nuk është dekretuar nga ana e Metës, pas largimit të Visho Ajazi Likës.
Vendimi i Metës për t’i thënë ”JO” Lleshit ka qenë një rast i paprecedentë, pasi në shumicën e rasteve presidentët që vendi ka pasur kanë kaluar çdo propozim të bërë nga kryeministrat për qeverinë.
Shumë analistë janë ndarë më dysh në qëndrimet e tyre, ku një pjesë e konsideron lëvizjen e Metës tentativë për të ngritur profilin e tij politik, ndërsa të tjerë e kanë cilësuar të drejtë vendimin e Metës, sa kohë që Kushtetuta ja lejon dhe ai nuk mund të funksinojë si noter i kryeministrit.
Vetë Rama dhe Meta kanë pasur dje një takim rreth një orë e gjysmë mes tyre në Presidencë, ku në mbyllje të tij, nga zyra e kryeministrisë u konfirmua vijimi i bashkëpunimit mes dy institucioneve. Rama u kërkoi dy ditë më parë deputetëve që të mos komentonin qëndrimin e Metës, pasi sipas tij ata ishin shumica, dhe duhet të merrnin vendimet e duhura në respekt të vendit dhe qytetarëve që i kishin zgjedhur.
