Ministri i Infrastrukturës dhe Energjetikës ka komanduar Azbi Arapin në krye të Drejtorit të Përgjithshëm të Shërbimeve të Transportit Rrugor (DPSHTRR). Aktualisht Arapi mban postin e Zëvendës Drejtorit të Përgjithshëm Ekonomik.
Në një njoftim për shtyp, Drejtoria e Përgjithshme e Shërbimeve të Transportit Rrugor thotë se ky komandim nga ministri Damian Gjiknuri, u bë për të mos kolapsuar punën institucionale në Drejtorinë e Përgjithshme të Shërbimeve të Transportit Rrugor (DPSHTRR).
“Arapi duke u bazuar në programin e Qeverisë RAMA 2, po trajton problematikat e ndeshura në këtë institucion, me qëllim për të rritur cilësinë e shërbimit ndaj qytetarëve, me ambicien realizimin e tyre në kohë reale. Nën vëmendjen e tij, DPSHTRR-ë angazhon të gjitha strukturat e saj, që shërbimi ndaj qytetarëve në vazhdimësi të jetë në rritje cilësore dhe sipas standardeve më të larta”, thuhet në njoftimin e DPSHTRR.
Arben Isaraj dha dorëheqjen disa ditë më parë, nga posti i Drejtorit të Përgjithshëm të Shërbimeve të Transportit Rrugor, pas arrestimit të vëllait të tij.
