Ambasada ruse në Tiranë është kujdesur, që të shpërndajë ditën e djeshme një njoftim për median, pas një takimi të ambasadorit Karpushin me kreun e kishës ortodokse shqiptare, Kryepiskopin Anastas Janullatos. Zyra e shtypit nëpërmjet një njoftimi të shpërndarë edhe në faqen e saj në Facebook shkruan se, ambasadori Aleksandër Karpushin dhe kryepeshkopi Janullatos në këtë takim kanë folur për marrëdhënie vllazërore mes kishës shqiptare ortodokse dhe asaj ruse.
“Ambasadori Karpushin zhvilloi sot një takim me Primatin e Kishës Orthodhokse Autoqefale të Shqipërisë, Kryepiskopin e Tiranës, Durrësit dhe gjithë Shqipërisë, Fortlumturinë e Tij Anastas. Gjatë bisedës u diskutuan disa çështje në lidhje me bashkëpunimin midis kishave vëllazërore orthodhokse të Rusisë dhe Shqipërisë”, thuhet në këtë njoftim të ambasadës ruse në Tiranë.
Nuk dihet se çfarë ka biseduar konkretisht mbi këtë temë kryepeshkopi Anastas me një përfaqësues diplomatik të shtetit rus për çështjen e marrëdhënieve mes dy kishave, por ky takimi vjen në një kohë që feja ortodokse ndodhet në një prej krizave më të rënda në historinë e saj. Njohja që Patriarkana e Stambollit i bëri Kishës Ukrainase është shoqëruar me një kundërpërgjigje radikale nga Kisha Ortodokse ruse, e cila shpalli skizmën (ndarjen) nga Patrarikana pas shekujsh njësimi. Për këto zhvillime Kisha e Ortodokse e Shqipërisë, nuk është deklaruar zyrtarisht ende edhe pse kreu i saj Kryepeshkopi Anastas është një prej figurave më të larta dhe me ndikim, në botën ortodokse.