U mbyll në mënyrën më të keqe të mundshme aventura e Julen Lopeteguit në stolin e Realit të Madridit.
Një pikë e grumbulluar në 5 ndeshjet e fundit të La Ligas por jo vetëm kaq pasi disfata e kësaj të diele në El Clasicon ndaj Barcelonës me rezultatin e thellë 5-1 peshon shumë.
Menjëherë pas humbjes ndaj Barçës, sipas asaj që bëjnë të ditur mediat spanjolle Marca dhe AS që qëndrojnë shumë pranë klubit madrilen presidenti Florentino Perez ka marrë vendimin për të shkarkuar Lopeteguin.
Largimi i ish-trajnerit të Spanjës do të zyrtarizohet këtë të hënë, ndërkohë që siç është thënë edhe gjatë këtyre ditëve të fundit, pasuesi i tij në stolin e Los Blancos do të jetë Antonio Conte.
Drejtuesit e Realit ka nisur bisedimet me italianin i cili për momentin ndodhet në Londër dhe arritja e një marrëveshjeje është thjeshtë çështje orësh.
Vetë Lopetegui nuk e pranon shkarkimin dhe në konferencën për shtyp pas ndeshjes ndaj Barçës deklaroi se ai beson te skuadra dhe do të vazhdojë punën.
“E di si funksionon futbolli, nuk jam idiot, në raste të tilla fajin e ka trajneri. Por në këtë sport kur fitohet, fitojmë të gjithë bashkë ashtu edhe kur humbasim. A do të shkarkohem? Nuk jam unë ai që marr këto vendime, unë mendoj vetëm për skuadrën dhe besoj, të tjerat nuk janë problemet e mia”, deklaroi Julen Lopetegui.
