Edhe këtë fundjavë Policia Rrugore e Tiranës, ka ushtruar kontrolle në rrugë, me synim parandalimin e aksidenteve.
Policia thotë se gjatë natës mes të shtunës dhe të dielës, “Shpejtësia mbi normat e lejuara që varionte deri në 190 km/h, gara të rrezikshme në rrugë dhe alkool gjatë drejtimit të automjetit që varionte deri në 1.14 mg/l, ishin shkeljet të cilat ‘zbehën’ argëtimin edhe këtë fundjavë”.
Sqarohet se për shkak të rrezikshmërisë që paraqesin, këto shkelje ishin në radarët e Policisë Rrugore të Tiranës, përgjatë orëve të vona të së premtes deri në orët e para të mëngjesit të së shtunës, si dhe gjatë orëve të mbrëmjes së djeshme e deri në orën 05.00 të mëngjesit të sotëm.
Nga kontrollet e alternuara si në zonat urbane dhe ato interurbane të kryeqytetit janë konstatuar dhe arrestuar në kushtet e flagrancës 13 persona, nga të cilët 12 për drejtim mjeti në gjendje të dehur dhe një për korrupsion aktiv ndaj personave që ushtrojnë funksione publike.
Janë pezulluar 34 leje drejtimi për drejtim mjeti nën efektin e alkoolit dhe janë pezulluar 32 leje drejtimi për shpejtësi mbi normat e lejuara.
Gjithashtu janë proceduar administrativisht 10 drejtues mjetesh për mosrregullim shpejtësie në qendrat e banuara dhe gara në shpejtësi, si dhe 21 drejtues mjetesh të pa pajisur me siguracionin e detyrueshëm.
Janë proceduar edhe 94 drejtues mjetesh për shkelje të tjera të rregullave të qarkullimit rrugor.
“Siguria në rrugë, mbetet sfida jonë, bashkohu edhe ti me ne, mos drejto mjetin nën efektin e alkoolit, respekto kufizimet e shpejtësisë dhe rregullat e qarkullimit”, është apeli përmbyllës i Policisë Rrugore.
