Nga Boldnews.al
Për të kuptuar sa ngushtë është situata për një zyrtar të lartë të PS-së, mjafton të shohësh reagimet e tyre, kur huazojnë një shprehje të kahershme të kryeministrit Rama me togfjalëshin: “Nuk ka bir kurve…”
I ndodhur ngushtë nën frikën e shtrëngimit të prangave në duar, fiks këtu e një vit më parë edhe Saimir Tahiri u shpreh se: “Nuk ka bir kurve që do më ndalë për të kërkuar drejtësi”. Po me të njëjtin fjalor, edhe Vangjush Dako, kryebashkiaku i Durrësit prej 12 vitesh, përdori po fjalët: “Nuk ka bir kurve…”
Tashmë basti që po qarkullon është se cili personazh tjetër politik nga brenda qeverisë do të rihuazojë këtë zhargon që shkon publikisht vetëm për veshët e kryeministrit.
Po çfarë i lidh këta njerëz të pushteshëm të së majtës me togfjalëshin “bir kurve”? Asgjë më pak ose më shumë se të qenit ngushtë në një situatë, të dyshuar të lidhur me krimin e trafikut të drogës dhe njëkohësisht edhe atë të krimit elektoral. Në të dyja rastet, mesazhet shkojnë për Ramën, duke ia bërë të qartë se nëse ai do i “shesë” për interesin e ngushtë të ruajtjes vetëm të karriges së tij, atëherë ata do të nisin të flasin dhe nëse flasin, nuk ka “bir kurve” që mund ti ndalë…
Ky fjalor i rëndë, banal, por i pranushëm në “bastard-politikën” që ka mbërthyer deri në normalitet Rilindjen, ka zënë vend dhe do zërë edhe më shumë kur aktualisht kryebashkiaku Vangjush Dako nuk lë ditë pa sulmuar kryeopozitarin Lulzim Basha. E quan “toç”, “peshk rezervati”, e madje edhe pjellë të Sali Berishës. Por kushdo që e kupton situatën e vërtetë, e ka të qartë se lufta e Vangjush Dakos, apo të të tjerë personazhe politike të përfolur fort për lidhjet me krimin, nuk është me liderin e opozitës, por me të tijët brenda radhëve të PS-së, që duket sikur po ua dorëzojnë drejtësisë.
“Ti je një peshk rezervati dhe më e shumta mund të të hajë Salianji se Saliu s’bëhet llaf.. Po ato që përsërite prapë si skapamento e prishur ishalla s’do ti kesh harruar kur të vish në gjyqin e radhës. Kurse atë lejen për pistën në det mirë bëre që s’e përmende prapë, se do e kishe ngrënë dyfish padinë për atë! Ik fli gjumë tani tek vaska e peshkut ku të rrit Saliu me Kunatin, se Dakon këtu e ke, në Durrës me telefon në dorë ditë-natë o toç!”-shkruan kryebashkiaku I bashkisë së dytë më të madhe në vend.
Edhe në reagimin e fundit Dako sfidon, duke premtuar se është me “telefon në dorë”…. Pikërisht me atë telefon që fliste me bandën tashmë të arrestuar të Avdylajve në Shijak. Me ata persona që bënë fushatën një vit më parë, duke çuar vota në shërbim të Partisë Socialiste.
Nuk duhet të harrohet që Dako, (në përgjime dyshohet se thirret me nofkën “xhuxhi”), është një “gjigant” i vërtetë në thithjen e votave në prag të fushatave elektorale. Është nga të parët që futi parimin një “vëzhgues pallat më pallat”, që nënkuptonte se një pjestar i sfatit duhet të bënte listat e votuesve dhe të mësohej se për kë do të votonin. Pasi kishte në duar listat, niste edhe fushata në disa raste e trysnisë, në të tjera me joshje me para për të siguruar votat. Dhe Rama i ka detyrime Dakos, si numri një i fushatës elektorale të vitit 2017, pasi nga 14 mandate deputetësh që kishte Qarku Durrës , tetë i fitoi PS, 4 PD dhe 2 LSI.
Nuk është e lehtë të mposhtësh dikë që të ka sjellë dhe mban në pushtet, në formën më të mirë që dinë të bëjnë nëpërmjet blerjes dhe presionit nga bandat e lidhura me trafiqe dhe vrasje, ndaj Dako ka të drejtë të kërcënojë Rilindjen kur thotë: “Nuk ka bir kurve…”
