Nga Boldnews.al
Dorëheqja e imponuar e Fatmir Xhafajt nga posti i Ministrit të Brendshëm pritet të sjellë të tjera lëvizje tektonike brenda maxhorancës socialiste. Kryeministri Edi Rama, i vendosur në siklet për shkak të informacioneve të shumta për lidhjen e qeverisë së tij me krimin, me siguri e ka ndjerë se karrigia e tij ishte e kërcënuar nga ish-komunisti, i konvertuar në “njeriun e ndërkombëtarëve”, Fatmir Xhafaj.
Ministri i Brendshëm i sapolarguar, dukshëm kishte nisur të rivalizonte pushtetin politik të Edi Ramës, duke krijuar aleanca fluide me të paktën dy prej njerëzve, të cilët janë pompuar në politikë dhe administraën e lartë shtetërorë nga kryetari i Partisë Socialiste-kryebashkiaku i Tiranës, Erion Veliaj dhe Sekretari i Përgjithshëm i Kryeministrisë, Ëngjëll Agaçi.
Në media të ndryshme, shefi i marrëdhënieve me publikun i Ramës, Endri Fuga, konsiderohet si “eminenca gri” e kryeministrit. Por, realisht, ata që i ka lidhur puna me vendimmarrjet qeveritare, e dinë shumë mirë se ky përcaktim është për Ëngjëll Agaçin, ish-avokatin në Romë, i cili u afrua nga Rama për të drejtuar “artin e menaxhimit” në punët qeveritare.
Agaçi, megjithëse pranë Ramës, prej disa kohësh ishte shndërruar në një bashkëpunëtor të ngushtë të Fatmir Xhafajt. Të dy së bashku kanë menaxhuar, krahas të tjerave, edhe procesin e emërimit të anëtarëve të Komisioneve të Vetingut. Një Xhafë që kontrollonte policinë nga posti i Ministrit të Brendshëm, një Xhafë që kontrollonte prokurorinë nëpërmjet Arta Markut dhe një Xhafë që, së bashku me Agaçin kontrollojnë Vetingun, ishin garanci të forta që, për çdo vendimmarrje të ndryshme, ku lëvizin interesa të mëdha, të mos kishin asnjë kokëçarje ligjore.
Pushtetit që po fitonte dyshja Xhafaj-Agaçi iu bashkua edhe “produkti i Edi Ramës”, Erion Veliaj. Kryebashkiaku i Tiranës, i cili hyri në Partinë Socialiste nga dritarja që i hapi Edi Rama, nisi të shijonte frytet e pushtetit në Bashkinë më të madhe në vend, duke tentuar që të krijojë lobimin e nevojshëm për të arritur qëllimin e tij final-të ishte kandidati më i mundshëm për të rivalizuar vetëm Edi Ramën për postin e kryetarit të Partisë Socialiste.
“Lali Eri” prej kohësh i ka ftohur raportet me “mentorin” e tij politik, aq sa tashmë ende nuk është e qartë nëse ai do të jetë kandidati zyrtar i Partisë Socialiste për bashkinë e Tiranës në zgjedhjet e ardhshme lokale. Veliaj, pavarësisht se nën zë, ka përcjellë në kanale të ndryshme mediatike se ai mund të kandidojë edhe si i pavarur, nëse nuk merr bekimin e Edi Ramës.
Kjo “siguri” e Veliajt duket se buron pikërisht nga triumvirati që ka formuar me Fatmir Xhafaj dhe Ëngjëll Agaçin. Natyrisht, treshja e konsoliduar, megjithëse fluide, kishte dhe ka pas vetes një tabor njerëzish, të cilët, të gjithë sëbashku, kanë synuar të marrin më shumë pushtet se sa u ka dhënë Rama.
Arrestimet e fundit, sidomos ato të dy ish-deputetëve Arben Ndoka dhe Arben Çuko, ishin sinjali kërcënues më i fortë që Fatmir Xhafaj i dha pushtetit të Edi Ramës. Dhe nuk përfundoi këtu sipërmarrja e guximshme e ministrit të Brendshëm të sapolarguar. Nëpërmjet mekanizmave të tij, me shumë mundësi, është ai që ka “trafikuar” në media përgjimet që lidhin mikun e ngushtë të Edi Ramës, kryebashkiakun e Durrësit, Vangjush Dako, me bandën kriminale të Avdulajve.
Një arrestim i mundshëm i Dakos do të përkthehej në një goditje fatale për pushtetin e Edi Ramës, i cili kryebashkiakun e Durrësit e ka jo vetëm mik, por edhe bashkëpunëtor dhe kontributor të rëndësishëm të Partisë Socialiste.
Në të gjithë këtë skenar, shumëkush ndoshta ka bërë planet pa llogaritur një detaj “të vogël” që e bën Ramën më të fuqishëm se të gjithë ata bashkë- firmën që ai ka si kryeministër dhe si kryetar partie.
Si kryeministër, Rama firmosi “dorëheqjen” e Fatmir Xhafaj. Si Kryeministër, Ramën nuk e pengon asgjë që të firmosë shkarkimin e Ëngjëll Agaçit dhe, si Kryetar Partie, ka të gjitha mundësitë që “Lali Erin” të mos e përfshijë në listën si kandidat zyrtarë për kryetar bashkie në Tiranë.
