Nga Boldnews.al
Fatmir Xhafaj u emërua në postin e lënë bosh nga Saimir Tahiri të Ministrit të Brendshëm, pa ndonjë dëshirë të madhe nga Edi Rama. Xhafaj kishte aureolën e “babait të Reformës në Drejtësi” dhe për këtë epitet ai kishte gjetur mbështetjen e ish-ambasadorit amerikan, Donald Lu.
Rama, pas largimit të Tahirit, i cili më pas u akuzua për lidhje të forta me bandën kriminale të Habilajve, kishte piketuar Taulant Ballën për postin e Ministrit të Brendshëm. Balla, një njeri i përulur i kryetarëve, mund të ishte një zgjidhje e mirë e Ramës, për të mbajtur nën kontroll pushtetin e fuqishëm që buron nga informacioni policor.
Balla nuk e ka shuar asnjëherë shpresën e tij për të marrë portofolin e Ministrit të Brendshëm dhe kjo dëshirë, me shumë mundësi i është shtuar kur ka nuhatur se shefi i madh i tyre, nuk kishte simpati për Fatmir Xhafaj.
Por, atëherë kur Taulant Balla, i cili vetëm formalisht gëzon numri 2 të Partisë Socialiste, po shpresonte të arrinte qëllimin e tij, ai përballet me akuza të forta nga opozita për lidhjet me persona të krimit të organizuar.
Taulant Balla rezulton se është lidhje e ngushtë shoqërore me Mond Begon, një trafikant narkotikësh, i dënuar me 20 vjet burgim në Itali, si pjesë e bandës së Aldo Bares. Pasi dolën në media informacione për lidhjet e tij me Begon, Taulant Balla u detyrua të pranojë publikisht njohjen dhe miqësinë familjare me të.
Kjo lidhje u pasua me një kosto të lartë politike, jo vetëm për Ballën, por edhe për Kryetarin e Partisë, Edi Rama. Njerëz pranë Taulant Ballës janë të bindur se lidhja e tij me Mond Begon është bërë publike nga fijet që lidhen me Fatmir Xhafajn.
Taulant Balla, pas këtij episodi, u përball edhe me akuzën e ngritur nga kryetari i Partisë Demokratike, Lulzim Basha, se ai ishte garant i mbërritjes së 3.4 milionë eurove të një grupi kriminal nga Belgjika në drejtim të Shqipërisë, nëpërmjet automjeteve “Toyota Yaris”. Balla e ironizoi deklarimin e Bashës, por vetëm pak ditë më pas, policia zbuloi në Portin e Durrësit shumën e parave.
Maxhoranca, pas zbulimit të parave, akuzoi segmente të Shërbimit Sekret se i kishte dhënë informacion Lulëzim Bashës dhe se ky i fundit, me bërjen publike, mund të kishte ndikuar në dëmtimin e një hetimi në zhvillim. Në fakt, informacioni për mbërritjen e 3.4 milionë eurove ka qenë vetëm në dispozicion të policisë, e cila menaxhohej nga Fatmir Xhafaj. Tek kjo linjë mund të kërkohet edhe burimi i informacionit që lidhte sasinë e parave me Taulant Ballën.
Së fundi, emri i Ballës u shfaq edhe në rastin “Xhisiela”, në Krujë. Nënkomisar Emiljano Nuhu, i cili po hetonte për dhunimin e Xhisiela Malokut nga Rexhep Rraja, djali i deputetit Rrahman Rraja, deklaroi publikisht se ishte kërcënuar me armë, në zyrën e tij, në praninë e Taulant Ballës.
Natyrisht, edhe në këtë rast, maxhoranca akuzoi denoncuesin për shpifje dhe mbrojti Taulant Ballën, duke mohuar kategorikisht se ai ka qenë në postën policore të Fushë-Krujës ditën që pretendon se është kërcënuar oficer Nuhu.
Policia e Fatmir Xhafaj i kishte të gjitha mundësitë të mbështeste versionin e Taulant Ballës, duke bërë publike pamjet e kamerave të sigurisë së postës policore të Fushë-Krujës natën e ngjarjes. Por, policia e Xhafajt, e mohoi praninë e Ballës vetëm me deklarata, ndërkohë që pamjet e kamerave të sigurisë nuk u bënë asnjëherë publike. Justifikimi zyrtar i policisë ishte që “pamjet e kamerave të sigurisë tashmë janë në duart e prokurorisë, që po ndjek hetimet për dhunimin e Xhisiela Malokut”.
Mos-publikimi i pamjeve të kamerave të postës policore duket një justifikim i vështirë për t’u kapërdirë. Policia e Shtetit, e cila për të trumpetuar çdo lloj ngjarje, përfshirë edhe ato banalet, i shoqëron me pamje filmike, në rastin e akuzave ndaj Taulant Ballës ka zgjedhur që “të respektojë rigorozisht ligjin dhe të dorëzojnë pamjet në Prokurori”.
Pas goditjeve të njëpasnjëshme që mori Taulant Balla, ai tashmë nuk mund të realizojë ëndrrën e tij të shumëpritur për të zëvendësuar Fatmir Xhafajn në postin e Ministrit të Brendshëm. Balla tashmë duhet të shohë se si gjeneral Skënder Lleshi do të marrë në dorë frenat e policisë.
