Nga Boldnews.al
Prokuroria për Krime të Rënda ka bërë të ditur në media, nëpërmjet burimeve të saj, se ka nisur hetimin për kryebashkiakun e Durrësit, Vangjush Dako, për shit-blerje votash, pas…publikimit të disa përgjimeve në media.
Kjo frazë e trafikuar nga Prokuroria në media është sa e gënjeshtërt, aq edhe absurd. Së pari, shkaku që deklaron prokuroria për nisjen e hetimeve për Dakon është “publikimi i disa përgjimeve në media’. Në fakt, disa copëza përgjimi të publikuara së fundmi në media, kanë dalë pikërisht nga dosja hetimore me nr, 339, e cila është nën administrimin e vetë Prokurorisë.
Pra, tingëllon fare absurde që prokuroria të nisë hetimin në bazë të indicjeve mediatike, të cilat i referohen dokumentave të vetë prokurorisë.
Nga ana tjetër, informacioni i “trafikuar” në media nga ana e Prokurorisë se ‘kanë nisur hetimin për Dakon” është gjithashtu i gënjeshtërt. Hetimet për kryebashkiakun e Durrësit jo vetëm që nuk kanë nisur tani, por ato duhet të finalizoheshin, me shumë mundësi, me arrestimin e tij, në bazë të provave dhe fakteve të siguruara gjatë më shumë se një viti hetimesh.
Prokuroria për Krime të Rënda është nën akuzë publike nga Partia Demokratike dhe opozita shqiptare në tërësi për “vasalitet” ndaj qeverisë së Edi Ramës. Këto akuza, të përsëritura shpesh gjatë drejtimit të institucionit të Akuzës nga Kryeprokurorja e Përkohshme, Arta Marku, janë forcuar së fundmi, pas operacionit për arrestimin e bandës Avdulaj nga Shijaku.
Në bazë të përgjimeve të bëra publike deri më tani, rezultojnë dyshime të forta se kryebashkiaku i Durrësit, Dako, ka bashkëpunuar me elementët kriminalë të kësaj bande për të siguruar vota në favor të Partisë Socialiste. Por, pavarësisht provave që gjenden në dosje, Prokuroria për Krime të Rënda nuk lëshoi asnjë urdhër-arresti për Dakon.
Por, pasi ky bashkëpunim u bë publik edhe për median, Prokuroria deklaron se “nisi hetimin për Vangjush Dakon, pas publikimit të disa përgjimeve” të saj!
