Sipas të dhënave të publikuar nga Organizata UN WOMEN, e cila ka intervistuar 750 gra e vajza në tri Bashki të vendit atë të Tiranës, Durrësit e Fierit, 38% e grave dhe vajzave janë të rrezikuara nga ngacmimet seksuale në hapësirat publike.
”Nga numri i grave dhe vajzave të anketuara, vetëm 16 për qind kanë kërkuar ndihmë dhe asistencë dhe fatkeqësisht shumica prej këtyre, kanë kërkuar ndihmë tek të afërmit dhe jo tek institucionet shtetërore”, u shpreh sot Agustela Nini.
Sipas saj pabarazia gjinore është shkaku kryesor i ngacmimeve seksuale dhe dhunës me bazë gjinore por po ashtu edhe mangësitë në infrastrukturë.
“Nga ana tjetër, jo favorizues për situatën janë edhe faktorë të tjerë, si mungesa e ndriçimit të rrugëve dytësore, hyrjet në shtëpi dhe në autobus, shtëpitë e braktisura dhe mungesa e mirëmbajtjes së rrugëve dytësore dhe transporti publik i mbipopulluar sidomos në Tiranë”, u shpreh më tej Nini.
Në lidhje me këtë fenomen mungojnë raportimet në institucionet përgjegjëse ndërsa Organizatat në mbrojtje të të drejtave të grave apelojnë për parandalimin e këtij fenomeni por edhe ofrimin e shërbimit të kualifikuar për gratë dhe vajzat që janë viktimë e ngacmimeve seksuale.