Një italian është ndaluar nga policia në Tiranë, për llogari të autoritete italiane.
Boldnews.al ka mësuar eksluzivisht se ndaj italianit Masimilliano Croce, 45 vjeç (që shihni në forografi) të vënë në pranga , Gjykata e Velletri-t ka dhënë një dënim me 16 vite burgim për dhunë seksuale.
Italiani akuzohet për abuzime seksuale me disa fëmijë me aftësi ndryshe, në një strukturë ku punonte si edukator në shtetin fqinjë.
Në vitin 2013, ai u zhduk nga radari i autoritete ligjzbatuese italiane dhe u shpall në kërkim ndërkombëtar.
Hetimet e italianëve zbuluan se ai ka marrë në Shqipëri tranferta parash. U zbulua më pas se ndodhej në Tiranë, ku strehoj nga një mik shqiptar në Kombinat.
Pikërisht për të njoftuar kapjen e tij, në orën 14.00, ne Drejtorine e Pergjithshme te Policise se Shtetit pati nje konference te perbashket mes Policise se Shtetit dhe Policise Italiane.
Në deklaratën për mediat, Edi Merkaj, Drejtor i Departamentit të Policisë Kriminale në Policinë e Shtetit dha detaje të tjera rreth aksionit.
“Policia e Shtetit ka finalizuar operacionin e përbashkët me Policinë italiane duke arrestuar në Tiranë një shtetas italian, i cili ishte i dënuar nga gjykata atje për krime ndaj të miturve.
Operacioni u krye në bashkëpunim të ngushtë mes Policisë së Shtetit me Shërbimin Qendror Operativ në Drejtorinë e Përgjithshme Antikrim, skuadra e lëvizshme e kuesturës së Romës dhe Zyra e Interforcës pranë Ambasadës Italiane në Shqipëri. Hetimi ka nisur në mes të muajit Tetor dhe u mbyll me sukses në më pak se 15 ditë, falë bashkëpunimit intensiv ndërmjet agjencive tona dhe atyre italiane.
Shtetasi i arrestuar quhet Masimilliano Croce, 45 vjeç, nga Ciampino, Romë, i diplomuar për pedagogji për të mitur.
Sipas vendimit të gjykatës italiane, ky shtetas, në periudhën 2007 – 2014 ka kryer krime kundër të miturve, abuzime me fëmijë, pedofili. Në vitin 2017 është dënuar nga kjo gjykatë me vendim të formës së prerë, me 16 vite burg, për veprën penale ‘Dhunë seksuale ndaj të miturve’ Ky shtetas, gjatë periudhës së kryerjes së këtyre krimeve, ka shërbyer si mësues komuniteti për fëmijët e varfër dhe jetimë, në provincat e Romës dhe në qytetin e Romës.
Pas shkëmbimit të informacionit në kohë reale midis kolegëve italianë dhe Drejtorisë Hetimore Qendrore pranë Departamentit të Policisë Kriminale, është bërë i mundur lokalizimi dhe arrestimi i autorit, i cili fshihej në një banesë me qira në një zonë periferike të Tiranës. Autori i arrestuar i fshihej drejtësisë italiane prej më shumë se 4 vitesh”, tha ai.
