Hetimi për grupin e Avdulajve nga Shijaku ka zbuluar edhe disa fakte konkrete se si këta të fundit, por edhe Ndokat në Lezhë, janë angazhuar në blerjen e votave në favor të Partisë Socialiste, në zgjedhjet e përgjithshme të vitit 2017.
Prokuroria për Krime të Rënda ka në dispozicion të saj përgjime të personave të arrestuar në kuadër të “megaoperacionit” të fundjavës, ku pjesëtarë të këtyre familjave përfshihen në mënyrë aktive në blerjen e votave për maxhorancën. Megjithatë, për këto të dhëna, të cilat gjenden në aktet zyrtare të Prokurorisë, me shumë mundësi nuk do të hetohen nga Donika Prela dhe shefja e saj, Arta Marku.
“Boldnews.al” po sjell dy pasazhe, të cilat gjenden në dosjen e Prokurorisë, por që nuk i janë përcjellë gjykatës.
Gjatë hetimit për Avdulajt, Prokuroria, në aktet e saj konfidenciale, ndër të tjera shkruan: “…Njëkohësisht, evidentohen biseda të ndryshme për përfshirjen në fushatën zgjedhore të vitit 2017, ku shtetasit Astrit dhe Altin Avduli realizojnë biseda për blerjen e votave në favor të Partisë Socialiste….”.
Gjithashtu, gjatë hetimit për Ndokat, të cilat u finalizuan me arrestimin e ish-deputetit të PS-së, Arben Ndoka dhe disa familjarëve e miqve të tyre, Prokuroria ka zbuluar përfshirjen e tyre në blerjen e votave për Partinë Socialiste.
Në aktet hetimore të Prokurorisë për Krime të Rënda, ndër të tjera rezulton edhe ky pasazh: “…Po ashtu, nga përgjimet e telefonave të shtetasit Gjevi Ndoka (vëllai i Arben Ndokës) evidentohet se ky shtetas, në bashkëpunim me persona të tjerë, si para, edhe gjatë fushatës zgjedhore për zgjedhjet parlamentare të vitit 2017, është përfshirë në mënyrë aktive, duke ofruar dhe dhënë të holla (para) zgjedhësve për të votuar kandidatët për deputetë nën siglën e Partisë Socialiste….”
