Ministri i Mbrojtjes i Turqisë, Hulusi Akar, tha se do të ishte e dobishme që Greqia të largojë nga shqetësimet e saj të politikës së brendshme marrëdhëniet me Turqinë.
Duke folur në panelin editorial të Anadolu Agency (AA), ministri Akar mes tjerash bëri komente edhe në lidhje marrëdhëniet e vendit të tij me Greqinë.
Lidhur me diskutimet për zgjerimin e ujërave territoriale në 12 milje në detin Egje, Akar tha se do të marrin masat e nevojshme në rast se merret ndonjë vendim në kundërshtim me të drejtat dhe interesat e Turqisë.
“Në rast se marrin ndonjë vendim në kundërshtim me marrëveshjet, të drejtën ndërkombëtare, me marrëdhëniet e mira fqinjësore, është e hapur dhe e qartë se çka do të bëjmë kundër kësaj. Qëndrimi ynë është i qartë. Kemi çdo lloj mase. Dëshiroj që gjithkush ta dijë se nuk do të lejojmë në asnjë mënyrë fakt të përfunduar në lidhje me këtë çështje”, u shpreh Akar.
Ai tha se dëshirojnë të mos dhunohen të drejtat e njëri-tjetrit, të respektohen marrëveshjet dhe të sundojë arsyeja e shëndoshë mes dy vendeve.
“Nuk është e mundur që asnjë projekt të jetë i suksesshëm në këtë rajon në të cilën nuk marrin pjesë Turqia dhe Republika Turke e Qipros Veriore”, tha ai.
Minitri turk i mbrojtjes gjithashtu duke folur për ngacminin e anijes turke në lindje të Detit Mesdhe, tha se anijet luftarake të tyre në rajon janë duke siguruar mbrojtjen e duhur dhe se nuk do të lejojnë një ngacmim të ri.
“Ne vazhdojmë përpjekjet tona që ushtria jonë, forcat e armatosura të jenë fillimisht parandalues. Jemi për zgjidhjen e çështjes me anë të bisedimeve, metodave të paqes, pa u shndërruar në një konflikt të nxehtë”, tha më tej Akar.
Komentet e ministrit Akar vijnë një ditë pasi Turqia thirri ambasadorin grek në Ankara, Petros Mavroidi, në ministrinë e jashtme turke.
Ky hap erdhi pas deklaratave të fundit të Nikos Kotzias, i cili së fundmi dha dorëheqjen si ministër i jashtëm grek.
Kotzias ka thënë se Greqia është e gatshme të zgjerojë ujërat territoriale nga gjashtë deri në 12 milje.
Akar: Shkeljet e armëpushimit në korridorin e Idlibit janë zvogëluar për 90 për qind
Ministri i Mbrojtjes i Turqisë, Akar, tha më tej se në korridorin e Idlibit është tërhequr pjesa më e madhe e armëve të rënda dhe elementeve radikale. “Në korridorin 15-20 kilometra në Idlib është tërhequr shumica e armëve të rënda dhe elementeve radikale. Shkeljet e armëpushimit janë zvogëluar 90 për qind”, tha Akar.
Akar iu referua zonës së çmilitarizuar me një linjë prej 15-20 kilometrash, e cila ishte dakorduar të formohet deri më 15 tetor nga presidenti i Turqisë Recep Tayyip Erdoğan dhe ai rus Vladimir Putin gjatë një takimi në Soçi më 17 shtator, në të cilin ishte biseduar për masat shtesë për ruajtjen e armëpushimit në Idlib.
Akar paralajmëroi se të shtunën do të ketë mundësinë që çështjen e Idlibit dhe çështjet e tjera t’i diskutojë me ministrin rus, Sergey Shoygu.
Ministri turk tha se vendi i tij në asnjë mënyrë nuk do të lejojë korridor terrorist në jug.
“Në operacionin Mburoja e Eufratit kemi pastruar deri në dy mijë kilometra hapësirë dhe kemi neutralizuar tre mijë terroristë të DEASH-it”, shtoi më tej Akar, duke iu referuar operacionit antiterrorist të ndërmarrë nga Turqia në veri të Sirisë.
