Nga Boldnews.al
Arrestimi i Arben Ndokës mund të ishte bërë në të gjithë format, pa pasur nevojën e një toge nga forcat special RENEA, por urdhri nga lart ishte i prerë: ai duhet të bënte edhe një xhiro televizive, sepse kryeministrit “kjo kavje” do i shërbejë për PR (piar), propagandë.
Ish-deputeti Ndoka ishte një makinë e madhe elektorale, që në format që ai di ti bëjë më mirë, arriti ti sigurojë Partisë Socialiste një hambar të madh votash, në një zonë si Lezha, që historikisht njihet si bastion i së djathtës.
Për të kuptuar formën që PS triumfoi në Lezhë, Elbasan, Durrës, Shkodër e kudo tjetër, mjafton që të shkëputet një frazë nga “konkluzionet e prokurorisë”, në lidhje me fenomenin e shit-blerjes së votave.
Në përgjimet e kryera nga prokuroria dhe autoritete e huaja, rezulton se mes të tjerash vëllai i Arben Ndokës flet për shit-blerje votash gjatë zgjedhjeve të vitit 2017, në favor të kandidatëve të Partisë Socialiste.
“Nga përgjimet e telefonatave të shtetasit Gjevi Ndoka (vëllai i Arben Ndokës), evidendohet se ky shtetas në bashkëpunim edhe me shtetas të tjerë, para dhe gjatë fushatës zgjedhore të vitit 2017 është përfshirë në mënyrë active duke ofruar shuma parsh zgjedhësve për të votuar kandidatët e Partisë Socialiste”. Ky është konkluzioni i prokurorisë, por çuditërisht është akuzuar vetëm për falsifikim stampash, vulash e keqpërdorim tokash, por jo për krimin elektoral. Ky përmendet vetëm si një “detaj i vogël”.
Kryeministri e di më mirë se kushdo tjetër masakra që ka ndodhur me shit-blerjen e votës që ai të mbajë pushtetin. Këtë e bënte Ndoka në Lezhë dhe të tjerë syresh të fortë në qarqe të ndryshme të vendit. Synimi mbetej të kishte “tepsinë e pushtetit” i vetëm dhe për këtë shtrydhi çdo kapadai të zonës. Më pas atyre iu la pushtetin e lirë që edhe nëse nuk janë në detyrë, të kenë rolin e të plotfuqishmëve të krahinës, për rendin, pronat, tenderat dhe çdo para tjetër publike.
Kryeministrit kjo formë iu zbulua, nga opozita, media e ndërkombëtarët. Kjo ishte një nga arsyet e mos hapjes së negociatave dhe që Shqipëria ta shohë gjithnjë e më larg integrimin drejt BE-së. Për të rregulluar imazhin, Rama nuk e ka për gjë që pasi i shtrydhi kapaitë e tij, ti arrestojë, më pas me pranga në duar t’i filmojë publikisht nga kamerat e televizioneve të kontrolluara prej tij.
Për Ramën mjafton që të rregullojë propagandën, të mos i shembet kalaja e kashtës e ngritur për të treguar një Shqipëri ndryshe. Kryeministri nuk ka bërë të tjera llogari, që këta të fortë nuk ta falin kurrë ditët e burgut, për më shumë shfaqjen dhe turpërimin me pranga në duar për të bërë thjesht PR (piarin) e gjoja një qeverisje ndryshe.