Shpallja e emergjencës mjedisore në territorin e bashkisë së Durrësit, ku hidhen mbetjet urbane të pandara e të patrajtuara, përfshirë mbetjet e rrezikshme spitalore dhe industriale, nuk ka sjellë ende asnjë ndryshim në qytetin bregdetar. Kafshët e gjalla që ushqehen me mbetjet urbane e më pas përfundojnë në tryezat e konsumatorëve janë po aty, ku u premtua se do të ndërtohej një park i gjelbëruar për banorët e zonës. Lopët e zonës ushqehen midis mbetjeve, që grumbullohen aty nga makinat e transportit të bashkisë. Era e rëndë e dekompozimit të mbetjeve urbane të çan flegrat e hundës tej e për tej.
Banorët e zonës kanë kalitur durimin e tyre në një situatë të tillë mjedisore. Shpesh herë ata kanë protestuar, asnjëherë nuk janë lodhur të protetojnë për të përmirësuar kushtet e jetësës por pa zgjidhje konkrete. Sërish këtë javë një përfaqësi e tyre ju drejtua instiucioneve vendore për të ndërhyrë.
Tymi toksik që çlirohet nga djegia e pakontrolluar në natyrë e mbetjeve urbane shtrihet mbi zonën e banuar përreth dhe kampusin universitar e më tej drejt qytetit, i favorizuar nga era. Me shpalljen e emergjencës mjedisore, Bashkia e Durrësit nuk ka më lidhje me këtë çështje të nxehtë mjedisore. Zgjidhja tashmë pritet nga Qeveria. Banorët e zonës thonë se do të protestojnë për të kthyer vëmendjen nga problematika me të cilën përballen. Ata mbeten të ekspozuar ndaj efekteve negative të ndotjes në shëndetin dhe jetët e tyre .
Kryeministri i vendit Edi Rama ishte në vendgrumbullimin e mbetjeve urbane në Porto Romano të Durrësit në muajin korrik. Të gjithë këtë skenë të përsëritur në vite, e mati me hapat e tij ku premtoi mbylljen dhe kthimin e tij në një park të gjelbëruar në harkun kohor të 18 muajve. Nga ky premtim që duket se ndezi dritë jeshile në tunelin e errët, asgjë nuk ka ndryshuar. Mbetjet vazhdojnë të digjen në qiell të hapur. Rrethimi mungon dhe mbetjet kanë zgjeruar territorin e tyre.
