Nëse bilancet e Interit nën drejtimin e kinezëve të Suning kanë ardhur duke u përmirësuar, nuk mund të themi të njëjtën gjë për kushurinjtë e tyre të Milanit, të cilët nën administrimin e një tjetër biznesmeni kinez, Yonghong Li kanë pësuar humbje të mëdha.
Në të parin dhe të vetmin bilanc, dalë prej menaxhimit të Li, kuqezinjtë rezultojnë me 126 milionë euro humbje. Ky bilanc pritet të miratohet në mbledhjen e asamblesë së klubit, që tashmë menaxhohet nga fondi Elliot, më 25 tetor. Edhe pse fillimisht ishte thënë që bilanci shënonte 70 mln euro humbje, duket se kjo shifër është edhe më e madhe.
Për të pëmirësuar këtë bilanc, për momentin drejtuesit e Milanit nuk duhet të llogarisin përfitimit nga Liga e Europës, pasi UEFA ka pezulluar shpërblimet për kuqezinjtë. Vendimi i institucionit më të lartë të futbollit në Europë ka ardhur si masë paraparake për tu mbrojtur, në rast se klubi gjobitet, pasi vendimi i Gjykatës së Arbitrazhit Sportiv nuk është bërë ende i njohur.
