Një vrasje me armë zjarri ka ndodhur mbrëmë në Lushnje. Një 48-vjeçar i identifikuar si Qemal Halla nga fshati Shegas, është qëlluar me armë zjarri në kokë brenda në automjetin e tij. Ngjarja ka ndodhur vetëm 100 m larg shtëpisë së viktimës.
Mësohet se ai ka qenë duke pirë kafe në lokalin e fshatit dhe rreth orës 21:30 është nisur në drejtim të shtëpisë. Pasi ka udhëtuar për disa minuta, atij i është bërë pritë dhe është ekzekutuar me armë zjarri.
Forca të shumta policie kanë mbërritur në vendin e ngjarjes dhe vijojnë krehjen e zonës për kapjen e autorit të krimit.
Njoftimi i policisë:
Informacion paraprak
Në datën 09.10.2018, rreth orës 21:45, në fshatin Shegas, Lushnje, duke udhëtuar me mjetin e tij, rreth 100 m para se të mbërinte tek banesa, është qëlluar me armë zjarri shtetasi Q.H, 48 vjeç, i cili ka gjetur vdekjen.
Shtetasi Q.H ishte fermer dhe nuk njihet si person me precedent kriminal. Ekspertë të Hetimit të Krimit po hetojnë mbi shkakun dhe zbardhjen e rrethanave ende të paqarta.
Në ndihmë të grupit hetimor kanë shkuar një grup ekspertësh të Hetimit nga Drejtoria e Përgjithshme e Policisë së Shtetit. Forca të shumta policie nga Komisariati i Lushnjes, Drejtoria Vendore e Policisë Fier dhe FNSH Fier në vendngjarje.
Pika kontrolli dhe krehje zone nga forcat e Policisë për kapjen e autorëve. Grupi hetimor po punon për zbardhjen e plotë të ngjarjes dhe kapjen e autorit të saj.