Nga Boldnews.al
Rexhep Rraja, djali dhunues i deputetit socialist Rrahman Rraja, e dekonspiroi dënimin e tij të pritshëm minimal vetëm me anën e një shprehje me natyrë politike që ai tha për gazetarët në dalje të Gjykatës së Krujës, ku u njoh me masën e sigurisë “arrest në burg”.
Para kamerave të medias, ai foli me tone triumfuese: “Basha do ta shohë në zgjedhjet e ardhshme se kush është Rexhep Rraja”. Në këtë mënyrë, dhunuesi Rraja zbuloi se ai nuk do të qëndrojë gjatë pas hekurave, pasi, mesa duket, lidhjet e tij të forta politike, të cilat kontrollojnë policinë, prokurorinë dhe kanë vënë nën presionin e Vetingut gjykatën, do të mundësojnë lirimin e tij të shpejtë.
Rexhep Rraja po mbahet në paraburgim vetëm për veprën penale të “Përndjekjes” ndaj shtetases Xh.M, pavarësisht se ai dyshohet se ka konsumuar veprën penale të dhunës, armëmbajtjes pa leje, heqjes së padrejtë të lirisë.
Gjithësesi, edhe vepra penale e “Përndjekjes” parashikon dënimin nga 6 muaj deri në 4 vjet burgim. Por, Rexhep Rraja dhe familjarët e tij janë të bindur se, edhe nëse dënohet, ai do të marrë kohën minimale të dënimit.
Këtë e dëshmoi edhe vetë dhunuesi Rraja me “mesazhin” drejtuar kreut të Partisë Demokratike, Lulzim Basha. Djali i deputetit socialist i “tregoi” dhëmbët opozitës, duke i paralajmëruar për dështimin në zgjedhjet e ardhshme para maxhorancës.
Testi më i afërt elektoral është ai i zgjedhjeve lokale, që pritet të zhvillohen në verën e vitin 2019, pra, pas rreth 8 muajsh. Gjatë kësaj kohe, Rexhep Rraja është i bindur se do të jetë sërish i lirë dhe do të angazhohet “fuqishëm” në fushatën elektorale për Partinë Socialiste, me qëllim që të mundi opozitën në zonën e tij të banimit.
Në fakt, nëse pranohet që Rexhep Rraja do të jetë i lirë për zgjedhjet, atëherë duket qartë se çështja ndaj tij është e paravendosur dhe se arrestimi i tij është thjesht një veprim procedurial për të zbutur tonet agresive të oponionit publik dhe opozitar ndaj maxhorancës së Edi Ramës.
Rexhep Rraja u arrestua të dielën, me vendim gjykate pas kërkesës së vonuar me rreth 2 muaj të Prokurorisë së Krujës. Ai dyshohet se ka kryer veprën penale të “Përndjekjes” ndaj shtetases Xh.M., me të cilën ka pasur një lidhje intime disa-vjeçare.
Ngjarja për të cilën dyshohet djali i deputetit socialist Rrahman Rraja ka ndodhur në 19 korrik 2018. Por ajo u mbajt e fshehur nga Policia, ndërkohë që edhe Prokuroria u tregua inaktive, derisa rasti u bë publik nga nënkomisar Emiljano Nuhu, i cili kishte marrë kërcënime për shkak se po ndiqte hetimin e rastit.
