Nga Boldnews.al
Gjykata e Tiranës ka shpallur të pafajshëm ish-deputetin socialist, Alfred Peza, sot sekretar për median në Partinë Socialiste, i cili u akuzua nga Prokuroria e Përgjithshme në mesin e vitit 2017 për “pastrim produketeve të veprës penale”, fshehje të të ardhurave dhe deklarim të rremë të pasurisë.
Peza, në atë kohë deputet, u akuzua se nuk justifikonte me burime të paligjshme një pasuri mbi 1 milion euro. Për këtë shkak, ai humbi mundësinë për t’u rikandiduar si deputet në zgjedhjet e përgjithshme të Qershorit 2017.
Por, që nga ai moment, kanë rrjedhur shumë ujëra, si në sistemin e drejtësisë, ashtu edhe në karrierën e ish-deputetit Peza. Prokuroria e Përgjithshme, e cila me ligjin e asaj kohe kishte kompetencë hetimin e deputetëve, dërgoi dosjen e Pezës për gjykim në Gjykatën e Lartë. Për shkak të ndryshimeve në Kodin e Procedurës Penale, si rrjedhojë e Reformës në Drejtësi, dosja penale në ngarkim të Pezës bëri një qarkullim të plotë nga Gjykata e Lartë, në Gjykatën për Krime të Rënda e së fundmi në Gjykatën e Tiranës.
Gjatë këtij rrugëtimi 1-vjeçar, prokuroria, tashmë me lidership të ri shumë pranë qeverisë së Edi Ramës, zbuti në maksimum akuzat ndaj ish-deputetit Peza, sot një prej personave më të rëndësishëm në Partinë Socialiste.
Prokuroria e Përgjithshme, kur përfundoi hetimet në maj të vitit 2017, e akuzoi Alfred Pezën për 3 vepra penale; pastrim të produkteve të veprës penale, fshehje të të ardhurave dhe deklarim të rremë të pasurisë. Ndërsa, pasi dosja kaloi për kompetencë në Gjykatën e Tiranës, prokuroria lokale ndryshoi qëndrimin dhe e akuzoi ish-deputetin vetëm për një vepër penale-atë të deklarimit të rremë të pasurisë.
Nëpërmjet kësaj manovre proceduriale, Prokuroria e Tiranës hoqi dorë nga akuza për krijimin e mbi 1 milion eurove, pa asnjë burim të ligjshëm. Zbutja e akuzës nga Prokuroria e Tiranës i dha mundësinë gjyqtarit Artan Gjermeni që ta kishte shumë të lehtë për të shpallur Alfred Pezën të pafajshëm.
Sipas të dhënave të Gjykatës së Tiranës, procesi ndaj Alfred Pezës është mbyllur brenda 4 seancave, një kohë rekord për veprimtarinë normale të kësaj gjykate, të mbingarkuar me çështje gjyqësore.
Seanca e parë ndaj Pezës është zhvilluar në dt. 19 Korrik 2018. Kjo seancë është shtyrë, për shkak se nuk është paraqitur prokurori. Një javë më pas, në dt. 25 Korrik, është paraqitur prokurori, i cili ka kërkuar të njihet me dosjen. Menjëherë pas pushimeve të gushtit, në dt. 11 Shtator, zhvillohet seanca e radhës, në të cilën gjykata i jep kohën prokurorit që të paraqesë konkluzionet. Të premten e kësaj fundjave, gjyqtari Artan Gjermeni jep vendimin, duke e shpallur të pafajshëm për të vetmen vepër penale, për të cilën e akuzoi Prokuroria e Tiranës, atë të deklarimit të rremë të pasurisë.
Procesi gjyqësor ndaj Alfred Pezës u zhvillua në të njëjtën kohë kur Partia Socialiste, në Asamblenë Kombëtare të saj, e zgjodhi Sekretar për Median. Rastësi shumë e çuditshme dhe mjaft pozitive këto që i kanë ndodhur Alfred Pezës, së fundmi.
Fillimisht, Prokuroria e Tiranës i zbut akuzat e ngritura më parë ndaj tij, duke mos u marrë aspak me veprat penale që lidhen me mënyrën se si i ka krijuar 1 milion dollarë. Më pas, gjyqtari Artan Gjermeni e shpall të pafajshëm sapo ai u zgjodh Sekretar për Median i Partisë Socialiste.
Në bazë të këtyre zhvillimeve, ish-deputeti Alfred Peza tashmë është i lirë t’i shijojë në maksimum 1 milion euro ose mbi 1 miliardë lekëve, pasi ai ka marrë vulën e “legalizimit” të tyre nga Prokuroria dhe Gjykata. Tashmë ai është i denjë që të jetë pjesë e grupit të miliarderëve të Partisë Socialiste, të cilët propagandojnë Reformën në Drejtësi si “mrekullia, e cila do të luftojë krimin, korrupsion dhe pastrimin e parave”.
