Ambasadori amerikan Donald Lu, në ditët e fundit të qëndrimit të tij në Shqipëri, i ka dhënë një “shuplakë” qeverisë Rama në lidhej me Teatrin. I ftuar në emisionin Real Story të Sokol Ballës në Vizion Plus, Donald Lu bëri një deklaratë të fortë, e cila u kalua në hije. Kur Balla e pyeti në lidhje me debatin e Teatrit, Donald Lu u përgjigj kështu:
“Kemi pasur diskutime me homologet e BE gjatë ditëve të fundit. Qeveria, ambasada e SHBA dhe unë e mbështesim punë e BE në përpjekjen e tyre që ky ligj për Teatrin të mos kthehet në diçka që krijon hapësira për korrupsion duke i dhënë kontratën një biznesi të vetëm pa garë transparente apo pa i dhënë mundësinë njerëzve të tjerë që të marrin pjesë në projekt. Ky është një shqetësim jo vetëm në këtë rast, por edhe një shqetësim edhe më i përgjithshëm, sa herë kjo qeveri kërkon koncesione në vend të tenderave të hapur dhe të barabartë. Unë besoj se shqiptaret duhet të kërkojnë një garë të hapur dhe të ndershme sepse kjo ka më pak kosto për qytetarët dhe sjell cilësi më të mirë për ta.”
Pra, ambasadori amerikan Donald Lu, ashtu si edhe BE, shpreh haptazi shqetësimin e tij në lidhje me ligjin e Teatrit dhe përpjekjet e qeverisë për t’ia dhënë këtë projekt vetëm një kompanie, Fusha sh.p.k. Madje, Lu përforcon idenë se dhënie e projektit pa garë tek një kompani e vetme është diçka që krijon hapësira për korrupsion. Donald Lu vazhdon më tej duke e ngritur këtë shqetësim edhe për koncesione në përgjithësi që qeveria Rama jep duke thënë se ky është një shqetësim sa herë kjo qeveri kërkon koncesione në vend të tenderave të hapur dhe të barabartë.
Nga ana tjetër edhe BE, përmes një letre, u shpreh mbi cështjen e Teatrit. Në një letër dërguar sekretarit të përgjithshëm të Këshillit të Ministrave, Engjëll Agaçi, kreu i seksionit të Shqipërisë dhe Bosnje Hercegovinës në Drejtorinë e Zgjerimit të Komisionit Europian, Michaela Matuella, mes të tjerash, shkruante:
“Komisioni mirëpret angazhimin e autoriteteve shqiptare për ta amenduar Ligjin Special me qëllimin futjen e një thirrje për tender të hapur për zbatimin e projektit të zhvillimit të Teatrit Kombëtar, ku çdo kompani private mund të aplikojë me një projekt-propozim. (…) Në të njëjtën kohë Komisioni kërkon të nënvizojë rëndësinë e përcaktimit të kritereve të qarta dhe transparente dhe jo diskriminuese për përzgjedhjen e kompanisë fituese dhe zbatimin e Ligjit Special.”
Kështu, edhe BE ngre qartazi shqetësimin e dhënies së projektit të një kompanie të vetme dhe nënvizon rëndësinë e një gare transparente dhe jo diskriminuese. Pra, BE kërkon një garë, jo një paracaktim në një kompanie, por se më çfarë kriteresh dhe me çfarë gare u zgjodh kompanie Fusha sh.p.k këtë as Rama dhe Veliaj nuk na e thonë.
Përkundrazi, Rama dhe Veliaj kanë qenë dy promotorët më të mëdhenj të “projektit Fusha”. Vetë Veliaj si kryetar bashkie i ka dhënë një sërë projektesh kësaj kompanie, ndërsa kryeministri është shprehur se Fusha është pronar toke, prandaj nuk ka nevojë për debat. Këtë deklaratë Rama e dha në emisionin “Përballë” të Lutfi Dervishit në 30 korrik këmbëngulte në dy gjëra: Nuk ka nevojë për garë se kompania Fusha është pronar i tokës (në fakt Fusha ka vetëm 250 m2 në 8000 m2) dhe e dyta se ligje të tilla speciale janë të zakonshme në vendet perëndimore.
Mbi këtë temë u zhvillua edhe debate më i ashpër në Shqipëri. Madje edhe presidenti Meta ktheu ligjin duke përdorur si argument mungesës së garës dhe privimit të konkurrencës. Në këtë pikë, Rama dhe Veliaj (ky i fundit me paturpësinë më të madhe e quajti si fitore letrën e BE-së) gjenden në kundërshti të plotë me ambasadorin amerikan Donal Lu, BE-në, presidentin Meta, artistët dhe gjithë ata që mbështesin Teatrin. Por sic duket, asnjëri prej tyre nuk shqetësohet nga e gjitha kjo, pasi milionat e kullave në tokën e Teatrit, për ta peshojnë më shumë. /Lapsi.al.
