E ftuar në emisionin ‘Kjo Javë’ me Nisida Tufën, në News24, gazetarja e kronikës Klodiana Lala tha se aksioni i policisë në Nikël është dekonspiruar, pasi nga 11 të ndaluar vetëm 5 prej tyre u arrestuan, ndërsa të tjerët janë liruar për mungesë provash.
“Policia ka vepruar me të njëjtën strategji si në Nikël dhe në Shkodër. Është zgjedhur mëngjesi për t’i paraprirë çdo të papriture. Policia ka rrethuar zonën dhe ka fikur dritat. Operacioni ka si qëllim shkatërrimin e grupeve kriminale, por ne kemi vetëm disa të ndaluar. Pra provat që ka grumbulluar policia kanë qenë të pakta, disa armë dhe disa mjete të blindura.
Në Shkodër ishte i pritshëm një aksion i policisë, pasi ishte goditur nga ngjarjet kriminale. Unë e mirëkuptoj deri diku policinë, pra që janë gjetur vetëm armë sepse ata i mbajnë për të mbrojtur. Por nuk arrij të kuptoj aksionin në Nikël, pasi konsiderohet si një zonë ku fshihen persona me të shkuar kriminale. Është problematike mënyra si po bëhen operacionet sepse nuk janë grumbulluar prova. Burimet e mija bëjnë me dije se aksioni në Nikël u dekonspirua. Personat janë shfaqur të qetë në përballjen me policinë, çka tregon se ata e prisnin. Dyshimet e mia bien mbi punonjësit e policisë, pasi personat me të shkuar të errët kanë lidhje me policë”, tha Lala.
Klodiana Lala tha se policia duhet të ndërmarrë aksionin në befasi dhe nuk duhet të paralajmërojë në fillim, pasi kriminelët marrin masat. Lala u shpreh se “Forca e ligjit” nuk ka dhënë rezultatet e duhura.
“Kemi disa ditë që policia e shtetit po paralajmëron aksione ku strehohen persona me të shkuar kriminale. Në momentin kur policia thotë unë po veproj, kriminalët do marrin masat. Policia duhet të ndërhyjë në befasi. Përpara se të hyjë në operacion, duhet të ketë garantuar provat. Nuk mund të shkojë policia e armatosur dhe më pas gjykata i thotë se këta persona nuk mund të mbahen në burg se nuk ka asnjë provë. Paralajmërimi që bën policia është një paralajmërim që i informon eksponentët e krimit. Masa e sigurisë për 5 të arrestuarit në Nikel do të jepet nesër. Forca e ligjit nuk i ka dhënë rezultatet e duhura”, tha Lala.
Në vijim Lala theksoi se në momentin kur policia ka hyrë në shtëpinë e Durim Bamit, ambientet e shtëpisë kanë qenë të pastra. Kjo sipas saj, tregon se vetë Bami nuk është shqetësuar për këtë aksion. Duke skanuar të gjithë situatën, gazetarja theksoi faktin se policia duhet të ndërmarrë askione, por më parë duhet të sigurojë provat e mjaftueshme për të lënë në burg personat, që konsiderohen me rrezikshmëri kriminale.
“Një oficer policia më tha se shtëpia e Durim Bamit ishte e pastër dhe kjo tregon se ai nuk kishte asnjë shqetësim për askisonin”, tha Kodiana Lala.
“Ajo çfarë duhet evidentuar, se përpara se policia dhe RENEA të zbarkojnë në vendet kriminale, do të duhet prova pastaj arrestimi. Sepse një mungesë e tillë, i lë ato sërish të lirë. Realisht jemi përballë faktit se kemi policinë, e cila ka zbritur në terren, por nga ana tjetër nuk ka prova të mjaftueshme.
Nisur nga fakti se shumë eksponentë kanë lidhje me policinë, sigurisht kjo është ulur. Duhet të dimë se në disa vende ato kanë njohje dhe bëjnë ligjin. Kjo është thirrje për policinë e shtetit, do të duhet më parë të sigurojnë prova, ashtu siç ndodh në vendet e tjera, policia në fakt është e fjetur përballë krimit, shtoi Lala.
Në lidhje me aksionin e policisë në Nikël, gazetarja shtoi se, “Për në Nikël në mesnatë ka nisur aksioni, ka pasur snajperistë të cilët janë vendosur nëpër pallate, ka pasur bashkëpunime me policinë lokale. Në momentin nga 4:30 është bërë trokitje derë më derë, rezultate tani dihet thjesht disa armë dhe ca shumë parash, por kanë arritur të justifikojnë. Shoqërimi ka qenë në masa të forta sigurie. Një oficer policia më tha se shtëpia e Durim Bamit ishte e pastër dhe nuk kishte asnjë shqetësim”.
E pyetur se nëse rezulton të jetë Nikla si qendër e nxhetë e kriminalitetit në vend, Lala pohoi këto detaje…
“Unë kam folur për eksponentë kriminalë në Shqipëri, por fakti se nuk janë zbardhur shumë ngjarje, kjo lë vend për dyshime. Sigurisht ka probleme edhe në vendet e tjera, por Nikla vijon të mbetet e nxehtë”, shtoi Lala.
