Filloi në mënyrën më të mirë aventura e Luis Enriques me Spanjën, ku kombëtarja e tij fitoi 2-1 në ndeshjen kundër Anglisë për UEFA Nations League. U vunë re disa ndryshime në lojën e skuadrës iberike, që gjithsesi nuk e kishte të lehtë përballë britanikëve.
Zgjedhja më surprizuese ishte ajo e Rodrigos si sulmues i krahut të djathtë, por gjatë ndeshjes u kuptua se ishte e duhura. Futbollisti i Valencias, arriti të shënojë golin e 2 në këtë takim, i cili rezultoi të ishte përcaktues. Por, jo vetëm kaq. Zakonisht tifozët janë mësuar me tiki-takan e zakonshme të spanjollëve, e cila nuk u pa dje. Mbajtja e topit për demat ishte 54.7%, numër i ulët krahasuar me atë që jemi mësuar të shohim zakonisht.
Një tjetër futbollist i cili bindi ditën e djeshme, ishte dhe Saul. Autor i golit të parë, lojtari i Atleticos së Madridit bindi me lojën e tij, duke i dhënë energji e ritëm skuadrës me rastet e krijuara.Gjithsesi, problemet nuk munguan, ku De Gea bëri heroin me pritjen ndaj Rashford, por dhe goli i dyshimtë që ju anullua anglezëve i shënuar nga Danny Welbeck.
Për spanjollët në fund, e rëndësishme ishte fitorja, e cila erdhi përballë një ekipi të madh që shkoi deri në gjysmëfinalet e Botërorit. Tifozët do të shohin një Spanjë ndryshe nga më parë, por shpresojnë të shohin të njëjtat suksese si në të kaluarën.