Nga Boldnews.al
Ministrat e kabinetit “Rama” prej 3-4 javësh gjendeshin nën ethet e lajmeve të penetruara nga zyra e kryeministrit, se do të kishte lëvizje qeveritare. Kjo skemë, e përdorur edhe më parë, duket se kënaq trillet e kryeministrit Edi Rama. Ai shton në këtë mënyrë notat e servilizmit nga ministrat, duke i vendosur ata nën pushtetin e tij absolut.
Kjo ishte situata gjatë periudhës Korrik-Gusht, ku ministrat kërkonin të shihnin nëse ishin në radarin e kryeministrit për t’u larguar nga karriget e tyre. Nga ana tjetër, të tjerë ofiqarë socialistë rritën pritshmëritë e tyre për të marrë një post qeveritar.
Por, e gjithë situata “e ankthshme” e ministrave përfundoi në Asamblenë Kombëtare të Partisë Socialiste, zhvilluar këtë fundjavë. Kryeministri Rama, në cilësinë e kryetarit të partisë bëri një shkarkim. Ai largoi nga grupi parlamentar i PS-së deputetin e Kurbinit, Gjetan Gjetani.
Shkakun për largim ia dha vetë Gjetani, pak orë para mbledhjes së Asamblesë, duke e ndihmuar në këtë mënyrë Edi Ramën që të gjente dikë për ta “djegur”. Gjetan Gjetani, një ish-polic Komisariati, u rrit në detyrë në mandatin e parë të Edi Ramës, duke u zgjedhur si drejtues i Hipotekës së Kurbinit. Më pas, në zgjedhjet e vitit 2017, ai u zgjodh deputet.
Gjetani nuk shquhet publikisht as për nivel politik dhe, aq më tepër, për rol vendimmarrës. Ai u kandidua, për shkak të fisit të madh në Kurbin. Pra, ai siguronte vota dhe kaq i mjaftonte Edi Ramës për ta caktuar si kandidat fitues në listën e deputetëve.
Këtë duket se e ka ditur shumë mirë edhe Gjetani, i cili, pas zgjedhjes si deputet, ka dëshmuar oreks të madh për punësime në administratë, siç u shpreh Edi Rama. Kërkesat e Gjetanit kanë shkuar deri në caktimin e drejtuesve të Policisë në Kurbin.
Kjo ishte shumë e qartë, kur, vetëm disa orë para Asamblesë Kombëtare të PS, deputeti Gjetani, i cili deri më tani njihej shumë pak publikisht, bëri një deklaratë të fortë kundër policisë lokale në qytetin e tij.
Duke marrë shkas nga disa ngjarje kriminale të ndodhura ditët e fundit në Kurbin, Gjetani shkroi në rrjetin sociale facebook se policia në Kurbin është një hallkë e paaftë dhe e korruptuar. Ai ka paralajmëruar se do të kërkojë interpelancë në parlament për këtë ngjarje të rënd. Deputeti Gjetani ka paralajmëruar se do të jetë ai i parë që do të ngrihet në protestë, ndërsa do t’iu bëjë thirrje banorëve t’i bashkohen atij.
Kaq ka mjaftuar që Gjetani të shndërrohet në “kokën e turkut” të Asamblesë Kombëtare të Partisë Socialiste. Edi Rama e deklaroi shkarkimin e tij në fjalimin e gjatë para strukturave drejtuese të PS-së.