Nga Boldnews.al
Ai nuk heq dorë. Kjo është forma e tij për të treguar se këtu qeveriset. Kryeministri “vitual” këtë radhë shfaqi premierën e radhës të serialit: “portali shqipëriaqëduam”, duke detyruar hallexhinjtë që ta falenderojnë kreun e qevrisë, e madje të tregojnë sesi sa hap e mbyll sytë iu zgjidh një problem që pronën që kishte vite që rendej në gangrenën hipotekë.
Teksa shfaqja filloi, në “ERTV” u paraqit një qytetar me certifikatë pronësie në duar dhe aq i emecionuar ishte sa dridhej. Por situatën e merr shpejt “shpëtimtari” i përhershëm, kryeministri i vendit.
“Tani e vërteta është që jo vetëm që ka marrë dokumentin, por ka shkarkuar edhe drejtorin e hipotekës së Fierit”- tha Rama, duke folur pas qytetarit që tregoi peripecitë e shumta dhe zvarritjen e gjatë. “Kemi pasur disa raste në Hipotekën e Fierit, që kur pashë raportin kam kërkuar shkarkimin e Drejtorit të Hipotekës dhe një hetim i thelluar”- vijoi Rama.
Po ky nuk është rasti i vetëm. Thuajse në çdo dalje publike, Rama kërcënon publikisht zyrtërët që i ka vendosur vetë në atë post, por duke përdorur qytetarët si shkak për ti larguar nga puna.
Shumë qytetarë ankohen në portalin “shqipëriaqëduam” me shpresë se mund të gjejnë zgjidhje, qoftë edhe duke hequr kusuret se pasi tu zgjidhet problemi, do të detyrohen të falenderojnë publikisht kryeministrin. Por kjo formë jo rrallëherë ka futur në konflikt qytetarët me zyrtarët.
Edhe shkarkimet i bën në mënyrë publike, kërcënimet po ashtu me shprehjen bajate: “Po nuk ja zgjidhe deri nesër këtë problem qytetarit, në darkë të shkarkoj unë”. Kaq pa vlerë konsiderohen institucionet e vendit, ku një njeri i vetëm, i gjithëditshëm, e gjithëpushteshëm, (kryeministri i vendit), të bën gjyqin publik, fyen, denigron, e më pas arrin deri aty sa të fusë në konflikt qytetarët hallexhi me nëpunësit e lartë, të zgjedhur prej tij e ministrave të kabinetit.
Nuk është një telenovelë që një ditë mund të ketë fundin e saj, por ngjan një serial i përhershëm ku “kryeministri virtual”, nuk qeveris me akte ligjore, nisma të studiuara, por sipas rastit spontan duke futur në aktrim pa dëshirën e tyre edhe qytetarë, që në këmbim të zgjidhjes së problemit (që është detyra e institucioneve), detyrohen të bëhen figurantë e ndonjëherë edhe protagonistë për keq në shfaqjen e regjisorit, skenaristit dhe producentit, kryeqeveritar Edi Rama.
